Al Tahawi: Hadith 2577

٢٥٧٧: صہیب نے حضرت ابن عباس (رض) سے روایت کی ہے کہ میں جناب رسول اللہ (صلی اللہ علیہ وآلہ وسلم) کے پاس سے گزرا جبکہ آپ نماز ادا فرما رہے تھے اور میں گدھے پر سوار تھا اور میرے ساتھ بنی ہاشم کا ایک غلام تھا پس آپ نماز سے نہ پھرے۔ حضرت عبیداللہ نے حضرت ابن عباس (رض) سے نقل کیا کہ وہ دونوں صف کے آگے سے گزرے تو یہ ممکن ہے کہ ان کا گزر مقتدیوں کے سامنے سے ہو نہ کہ امام کے سامنے سے۔ پس اس سے مقتدیوں کی نماز نہیں ٹوٹتی۔ اس میں گدھے کے امام کے سامنے سے گزرنے کی کوئی دلیل نہیں ہے۔ مگر حضرت صہیب نے ابن عباس (رض) سے جو روایت کی ہے وہ یہ ہے کہ میں جناب رسول اللہ (صلی اللہ علیہ وآلہ وسلم) کے سامنے سے گزرا مگر آپ (صلی اللہ علیہ وآلہ وسلم) نماز سے نہ پھرے۔ اس سے اس بات پر دلالت مل گئی کہ امام کے سامنے سے گدھے کے گزر جانے سے نماز نہیں ٹوٹتی۔ جبکہ فصل اوّل میں منقولہ ابن عباس (رض) کی روایت میں ہے کہ گدھا وغیرہ اشیاء مذکورہ نماز کو قطع کرنے والی ہیں اور وہ روایت ابن ابی داؤد نے مرفوع بیان کی ہے۔ یہ روایت جس کو صہیب و عبیداللہ نے ابن عباس (رض) سے بیان کیا ہے یہ اس کے خلاف ہے۔ پس اب ہم جاننا چاہتے ہیں کہ یہ معلوم کریں کہ کس نے دوسری کو منسوخ ہوا۔ پس غور کے لیے مندرجہ روایات کو دیکھیں۔
تخریج : بخاری فی الصلاۃ باب ٩٠‘ ابو داؤد فی الصلاۃ باب ١٢‘ نمبر ٧١٦۔
عبیداللہ نے ابن عباس (رض) سے نقل کیا ہے کہ ہم دونوں صف کے آگے سے گزرے اس میں یہ احتمال ہے کہ مقتدیوں کے آگے سے گزرے ہوں اور اس سے مقتدیوں کی نماز میں فرق نہیں پڑتا اس میں دلیل نہیں کہ گدھے کا امام کے آگے سے گزرنے کا کیا حکم ہے۔ اور روایت صہیب میں ہے کہ جناب رسول اللہ (صلی اللہ علیہ وآلہ وسلم) کے آگے سے گزرا مگر آپ نماز سے نہیں پھرے۔
اس سے یہ بات ثابت ہوتی ہے کہ حمار اگر امام کے سامنے سے گزرے تو نماز کو قطع کرنے والا نہیں۔
ایک اشکال :
گزشتہ فصل میں ابن عباس (رض) کی روایت میں گدھے کے گزرنے کو نماز کا توڑنے والا قرار دیا گیا اور ابن ابی داؤد نے بھی اس کو مسند قرار دیا ہے اور عبیداللہ اور صہیب کی روایت میں اس کا الٹ ہے ان میں کون ناسخ ہے۔
جواب : ہم روایات کو پیش کر کے غور کرتے ہیں۔