Al Tahawi: Hadith 2810

٢٨١٠: عثمان بن عمر نے اپنی سند سے انس (رض) سے روایت کی ہے کہ جناب رسول اللہ (صلی اللہ علیہ وآلہ وسلم) کا گزر میدان احد میں حمزہ (رض) کے جسد کے پاس سے ہوا ان کے ناک ‘ کان ہونٹ کاٹ کر ان کا مثلہ کیا گیا تھا تو آپ نے فرمایا اگر مجھے صفیہ کی گھبراہٹ کا خطرہ نہ ہوتا تو میں اس کو اسی طرح چھوڑتا یہاں تک کہ پرندوں اور درندوں کے پیٹ سے ان کا حشر ہوتا آپ نے حمزہ (رض) کو دھاری دار چادر سے کفن دیا جس سے سر ڈھانپتے تو ان کے پاؤں ظاہر ہوجاتے اور جب پاؤں ڈھانپے جاتے تو سر ظاہر ہوجاتا ان کے سر کو ڈھانپ دیا گیا اور ان کے علاوہ کسی اور شہید احد پر آپ نے نماز جنازہ نہ پڑھی اور فرمایا میں قیامت کے دن تمہارا گواہ ہوں گا۔ یہ ابن عباس اور ابن زبیر (رض) ہیں دونوں حضرت انس (رض) کی مذکورہ روایت کی مخالفت کر رہے ہیں اور اسی طرح کی روایت حضرت ابو مالک غفاری (رض) سے بھی مروی ہے ۔
تخریج : ابو داؤد فی الجنائز باب ٢٧‘ نمبر ٣١٣٦‘ ترمذی فی الجنائز باب ٣١‘ نمبر ١٠١٦۔
حاصل روایات : اس روایت سے معلوم ہوتا ہے کہ آپ (صلی اللہ علیہ وآلہ وسلم) نے حمزہ (رض) کے علاوہ کسی احد کے شہید پر نماز جنازہ نہیں پڑھی مگر ان پر پڑھی اور حمزہ شہداء احد میں سب سے زیادہ فضیلت والے ہیں اگر شہید کی نماز جنازہ نہیں تھی تو آپ حمزہ (رض) پر نماز نہ پڑھتے جیسا کہ ان کو غسل نہ دیا گیا کیونکہ غسل نہ دینا یہ سنت شہداء تو ہے اب آپ کا ان پر نماز پڑھنا اور دوسروں پر نہ پڑھنا یہ احتمال رکھتا ہے۔
احتمال نمبر 1: آپ کو زخموں کی وجہ سے دوسروں پر نماز پڑھنے کی تاب نہ تھی اس لیے صحابہ کرام نے دیگر تمام پر نماز جنازہ پڑھی۔
حالانکہ دیگر روایات حدیث یہ ثابت کرتی ہیں کہ جناب رسول اللہ (صلی اللہ علیہ وآلہ وسلم) نے حمزہ (رض) اور تمام شہداء احد پر نماز جنازہ پڑھی ہے۔ روایات ملاحظہ ہو۔