Al Tahawi: Hadith 3882

٣٨٨٢: جعفر بن محمد نے اپنے والد سے انھوں نے جابر (رض) سے روایت کی ہے کہ جناب رسول اللہ (صلی اللہ علیہ وآلہ وسلم) جب مزدلفہ میں تشریف لائے تو وہاں مغرب و عشاء ایک اذان اور دو اقامت سے ادا کیں۔ اس روایت میں یہ ہے کہ جناب رسول اللہ (صلی اللہ علیہ وآلہ وسلم) نے نماز مغرب و عشاء ایک اذان اور دو اقامت کے ساتھ کے ساتھ ادا کیں اور یہ روایت مالک بن حارث نے جو ابن عمر (رض) سے روایت کی ہے اس کے خلاف ہے اور اس پر سب کا اتفاق ہے۔ دونوں نمازیں جن کو عرفہ میں جمع کیا جاتا ہے۔ اس کے لیے ایک اذان اور اقامت کہی جاتی ہے۔ پس نظر وفکر کا تقاضا یہی ہے کہ دونوں نمازیں جن کو مزدلفہ میں جمع کیا جاتا ہے۔ ان کا حکم پہلی نمازوں جیسا ہو۔
حاصل روایت : یہ روایت مالک بن حارث نے ابن عمر (رض) سے جو روایت کی ہے اس کے خلاف ہے اس میں ایک اذان اور دو اقامت کا تذکرہ ہے اور اس بات پر اتفاق ہے کہ عرفات میں جو نمازیں اکٹھی پڑھی جاتی ہیں ان کے لیے ایک اذان اور اقامت کہی جاتی ہے پس اسے سامنے رکھتے ہوئے مزدلفہ میں جمع کی جانے والی نمازوں کا بھی یہی حکم ہونا چاہیے۔