Al Tahawi: Hadith 4312

٤٣١٢: عبدالرحمن بن سابط کہتے ہیں کہ میں حفصہ بنت عبدالرحمن کی خدمت میں آیا اور میں نے انھیں کہا میں آپ سے ایک بات دریافت کرنا چاہتا ہوں مگر مجھے پوچھتے حیاء آتی ہے۔ وہ کہنے لگیں جو چاہے دریافت کرو اے بھتیجے ! میں نے کہا عورتوں سے دبر میں جماع کا کیا حکم ہے ؟ وہ کہنے لگیں مجھے امّ سلمہ (رض) نے بیان فرمایا کہ انصاری لوگ اپنی عورتوں کو الٹا لٹا کر ان سے جماع نہ کرتے تھے اور مہاجرین عورتوں کو اوندھا لٹا کر جماع کرتے تھے یہود مدینہ کہتے تھے کہ جس نے عورت کو اوندھا لٹا کر جماع کیا اس کی اولاد بھینگی پیدا ہوگی جب مہاجرین مدینہ منورہ آئے تو انھوں نے بعض انصاری عورتوں سے نکاح کئے تو مہاجرین میں سے ایک مرد نے ایک انصاریہ سے نکاح کیا اور اس نے اپنی بیوی کو اوندھا کرنا چاہا مگر اس نے انکار کیا اور وہ جناب امّ سلمہ (رض) کی خدمت میں حاضر ہوئی اور ان سے اپنی بات بیان کی پس جب جناب رسول اللہ (صلی اللہ علیہ وآلہ وسلم) تشریف لائے تو امّ سلمہ (رض) نے یہ بات آپ کی خدمت میں پیش کی۔ انصاریہ عورت حیاء کی وجہ سے باہر نکل گئی جناب نبی اکرم (صلی اللہ علیہ وآلہ وسلم) نے فرمایا اس کو بلاؤ۔ امّ سلمہ (رض) نے اس کو بلایا تو آپ نے یہ آیت پڑھی : نساؤکم حرث لکم فأتوا حرثکم انی شئتم۔ یعنی فقط ایک سوراخ (فرج) میں وہ جماع کرسکتا ہے۔ یہ روایت اس بات کی واضح دلیل ہے اس خاص سوراخ (فرج) کا حکم اس سوراخ کے علاوہ سے مختلف ہے اگر ان دونوں کا حکم یکساں ہوتا تو صمامًا واحدًا کہنے کا کوئی معنی نہ تھا۔
تخریج : دارمی فی الوضو باب ١١٣‘ مسند احمد ٦‘ ٣٠٥؍٣١٠‘ ٣١٨؍٣١٤۔
اور اس کی تائید ابن عباس (رض) کے قول سے بھی ہوتی ہے۔