Al Tahawi: Hadith 5036

٥٠٣٥: ابو اسحاق نے براء بن عازب (رض) سے نقل کیا وہ فرماتے ہیں بدر کے دن جناب رسول اللہ (صلی اللہ علیہ وآلہ وسلم) نے مجھے اور ابن عمر (رض) کو بلایا پھر چھوٹا قرار دے کر اجازت نہ دی اور احد کے دن اجازت مرحمت فرما دی۔ امام طحاوی (رح) فرماتے ہیں کہ یہ روایت بتلا رہی ہے کہ جناب نبی اکرم (صلی اللہ علیہ وآلہ وسلم) نے ابن عمر (رض) کو احد کے دن چودہ سال کی عمر میں لڑنے کی اجازت دے دی اور یہ بات روایت ابن عمر (رض) کے خلاف ہے اب ان میں کوئی روایت دوسرے کے خلاف حجت و دلیل نہیں بن سکی تو اب قیاس کے ذریعہ اس کا حکم تلاش کیا تاکہ دونوں میں اصح ترین قول کو پاسکیں۔ امام طحاوی (رح) فرماتے ہیں امام ابوحنیفہ (رح) اور امام ابو یوسف (رح) کے اقوال پر غور کیا تو غور و فکر میں یہ بات سامنے آئی کہ جس عورت کو حیض آتا ہو اس کی عدت تین قروء مقرر فرمائی گئی اور اگر نو عمری یا بڑھاپے کی وجہ سے حیض نہ آتا ہو تو اس کی عدت تین ماہ مقرر فرمائی گئی تو ایک حیض کے بدلے میں شریعت نے ایک ماہ کو مقرر کردیا کیونکہ عورت کو بعض اوقات ہر ماہ کی ابتداء اور اس کی انتہاء میں حیض آجاتا ہے اس طرح ایک ماہ میں دو حیض اکٹھے ہوگئے اور بعض اوقات اس کے دو حیضوں کے درمیان دو ماہ یا اس سے بھی زیادہ فاصلہ ہوجاتا ہے۔ تو عام عورتوں کا لحاظ کر کے حیض کا قائم مقام مقرر فرما دیا یعنی تین ماہ کیونکہ عام عورتوں کو ہر ماہ میں ایک حیض آتا ہے جب یہ معاملہ اس طرح ہے تو ہم نے دوسری طرف نظر کی کہ احتلام سے بچوں کے لیے بالغوں کا حکم لازم ہوجاتا ہے اور جب احتلام نہ ہو تو اس بات پر سب کا اتفاق ہے کہ اس کا کوئی نائب ہو ایک جماعت نے پندرہ سال کی عمر کو پہنچ جانا اس کا نائب قرار دیا۔ دوسروں نے کہا کہ اس سے کچھ زیادہ عمر اس کا نائب ہے یہ ٹھیک ہے کہ جس عمر میں عام طور پر احتلام ہوتا ہے وہ پندرہ سال ہے تو اسی وجہ سے نائب مقرر کیا گیا کیونکہ بچوں کے احتلام اور بچیوں کے حیض کی یہی عمر ہے اس سے کم یا زیادہ عمر کو مقرر نہیں فرمایا کیونکہ اس کا تعلق خصوصی حالات سے ہے اور اس سلسلے میں خاص کا حکم ہم معتبر قرار نہیں دیتے۔ بلکہ عام کے حکم کا اعتبار کرتے ہیں۔ جس طرح کہ حیض میں عمومی حکم کا اعتبار کر کے نائب (تین ماہ) مقرر کردیئے گئے پس اس سے امام ابو یوسف (رح) کا قول قیاس کے ساتھ موافق ثابت ہوا اور امام ابوحنیفہ (رح) اور امام محمد (رح) کے قول کی نفی ہوگئی۔ حضرت سعید بن جبیر (رح) کا قول اس سلسلہ میں امام ابوحنیفہ (رح) کے قول کے موافق ہے جس کو امام ابو یوسف (رح) نے نقل کیا ہے۔ ملاحظہ ہو۔
تخریج : بخاری فی المغازی باب ٦‘ مسند احمد ٤؍٢٩٨۔