Al Tahawi: Hadith 5177

٥١٧٦: عمرو بن عثمان نے اسامہ (رض) سے انھوں نے جناب نبی اکرم (صلی اللہ علیہ وآلہ وسلم) سے نقل کیا کہ مسلمان کافر کا وارث نہ ہوگا۔ امام طحاوی (رح) فرماتے ہیں : کہ بعض لوگوں کا خیال یہ ہے کہ جب مرتد ہونے والا اپنے ارتداد پر قتل ہوجائے یا مرجائے تو اس کا مال بیت المال میں جائے گا اس کی دلیل مندرجہ بالا روایات ہیں۔ دوسروں نے کہا مرتد کی میراث اس کے مسلمان ورثاء کو ملے گی۔ فریق اوّل کے مؤقف کا جواب یہ ہے کہ اس ارشاد میں جناب نبی اکرم (صلی اللہ علیہ وآلہ وسلم) نے متعلقہ کافر کی وضاحت نہیں فرمائی کہ اس سے کون سا کافر مراد ہے۔ ممکن ہے کہ اس سے وہ کافر مراد ہو جس کا کسی ملت سے تعلق ہے اور یہ بھی ممکن ہے کہ مطلق کافر مراد ہو۔ خواہ اس کا کسی ملت سے تعلق ہو یا نہ ہو۔ تو جب اس بات کا احتمال ہے تو کسی دلیل کے بغیر کسی ایک جانب کو متعین نہیں کیا جاسکتا۔ اب دونوں معانی میں سے ایک کی تعیین نہیں کی جاسکتی جو کہ جناب رسول اللہ (صلی اللہ علیہ وآلہ وسلم) کی مراد پر دلالت کرتی ہے۔