Al Tahawi: Hadith 5937

٥٩٣٦: عمرو بن شعیب عن ابیہ انھوں نے عبداللہ بن عمرو (رض) سے روایت کی ہے کہ مزینہ قبیلہ کا ایک آدمی جناب رسول اللہ (صلی اللہ علیہ وآلہ وسلم) کی خدمت میں آیا اور آپ سے پوچھنے لگا یارسول اللہ (صلی اللہ علیہ وآلہ وسلم) ! گمشدہ بکری میں آپ کیا حکم دیتے ہیں آپ نے فرمایا وہ تیری خوراک ہوگی یا تیرے بھائی کی یا بھیڑیئے کی۔ اپنے بھائی کے لیے اس کی گمشدہ چیز کو روک رکھو۔ اس نے پوچھا کہ اے اللہ کے نبی (صلی اللہ علیہ وآلہ وسلم) ! آپ گمشدہ اونٹ کے متعلق کیا حکم فرماتے ہیں۔ آپ نے فرمایا۔ تمہیں اس سے کیا غرض ؟ اس کے پاس مشک اور موزہ موجود ہے اور اسے بھیڑیئے کا کوئی خطرہ نہیں وہ گھاس کھائے گا اور پانی کے گھاٹ پر جائے گا اس کو چھوڑ د ویہاں تک کہ اس کا مالک و طالب اس کو آ لے۔ یہ حدیث بتلا رہی ہے کہ گمشدہ جانور کو پکڑ کر روک لیا جائے خصوصاً وہ جانور جن کے ضیاع کا احتمال قوی ہو۔ پس اس کے مطابق آپ کے ارشاد ” ان ضالۃ المسلم حرق النار “ اور ” لایاوی الضالۃ الاضال “ کا مطلب یہ ہوا کہ اس سے مراد وہ ٹھکانا دینا ہے جس میں تشہیر مقصود نہ ہو اور وہ پکڑنا جس میں لوگوں میں تشہیر مطلوب نہ تھی یہ دونوں حالتیں مالک کے لیے حفاظت کرنے کے خلاف ہیں یہ مفہوم اس لیے لیا جائے گا تاکہ ان روایات کا دیگر روایات سے تضاد نہ رہے اور اونٹ کے متعلق آپ کا یہ فرمانا تمہیں اس سے کیا غرض اس کے ساتھ مشک اور موزہ موجود ہے اس کے متعلق بھیڑیئے کا خوف نہیں ہے۔ اس میں اس بات کی دلیل ہے کہ اس کو پکڑنے کی ممانعت عدم خوف ہلاکت ہے اور بکری کے لیے اجازت کی وجہ بھیڑیئے کا خطرہ ہے اس سے یہ دلیل مل گئی کہ اونٹنی کا حکم بھی یہی ہے اگر اس میں بھیڑیئے کے علاوہ کسی اور چیز کے پکڑنے کا خوف ہو۔ تو اسے چھوڑنے اور ضائع کی بجائے پکڑنا اور مالک کے لیے محفوظ کرنا بہتر و اولیٰ ہوگا۔ جناب رسول اللہ (صلی اللہ علیہ وآلہ وسلم) سے اسی طرح کی ر وایات وارد ہیں جن سے گمشدہ اور لقطہ کا حکم ایک جیسا ثابت ہوتا ہے۔ لقطہ اور گمشدہ کا حکم ایک جیسا ہے جیسا ان روایات میں ہے۔