Al Tahawi: Hadith 605

٦٠٥: سعید بن جبیر نے ابن عباس (رض) سے خاص طور پر اسی طرح کی روایت نقل کی ہے البتہ اتنی بات ہے کہ یہ الفاظ زائد ہیں تدع الصلوٰۃ ایام حیضھا کہ ایام حیض میں نماز ترک کر دے۔ جن علماء نے اس قول کو اختیار کیا انھوں نے اس کو غسل کا پابند بنایا جو کہ ہر نماز کے لیے اسے کرنا ہوگا۔ علماء کی دوسری جماعت نے ان سے اختلاف کرتے ہوئے فرمایا کہ اس پر لازم یہ ہے کہ ظہر و عصر کے لیے ایک غسل کرے اور اس سے ظہر آخری وقت میں اور عصر اول وقت میں ادا کرے اور مغرب و عشاء کے لیے ایک غسل کرے مغرب کو مؤخر کرے اور عشاء کو اول وقت میں ادا کرے جیسا کہ اس نے ظہر و عصر کے سلسلہ میں کیا اور فجر کے لیے مستقل غسل کرے اور انھوں نے اپنے استدلال میں ان روایات کو پیش کیا۔
حاصل روایات :
ان دس روایات سے یہ بات ثابت ہو رہی ہے کہ مستحاضہ کے لیے نماز کی ادائیگی کی صورت یہ ہے کہ ہر نماز کے لیے غسل کرے گی۔
فریق ثانی کا مؤقف :
فریق ثانی کا مؤقف یہ ہے کہ ایام حیض کے علاوہ ہر روز تین بار غسل کرے ایک فجر کے لیے اور ظہر کو مؤخر اور عصر کو مقدم کر کے اول وقت میں دونوں کے لیے ایک غسل اور مغرب کو مؤخر اور عشاء کو اول وقت میں کر کے ایک غسل کرے۔