Al Tahawi: Hadith 6508

٦٥٠٦: ابن ابی ملیکہ نے حضرت مسور بن مخرمہ (رض) سے روایت کی ہے کہ جناب رسول اللہ (صلی اللہ علیہ وآلہ وسلم) کے ہاں جبے آئے یہ بات ابو مخرمہ کو پہنچی تو انھوں نے کہا اے بیٹے مجھے یہ معلوم ہوا کہ جناب رسول اللہ (صلی اللہ علیہ وآلہ وسلم) کے ہاں کچھ جبّے آئے ہیں اور آپ ان کو تقسیم فرما رہے ہیں تو تم ہمیں وہاں لے جاؤ۔ مسور کہتے ہیں کہ ہم وہاں گئے ہم نے جناب رسول اللہ (صلی اللہ علیہ وآلہ وسلم) کو اپنے مکان میں پایا۔ میرے والد نے کہا میرے بیٹے ۔ جناب رسول اللہ (صلی اللہ علیہ وآلہ وسلم) کو میرے لیے بلاؤ۔ مسور کہتے ہیں میں نے اس بات کو بڑا سمجھا اور میں نے کہا کیا میں تمہارے لیے جناب رسول اللہ (صلی اللہ علیہ وآلہ وسلم) کو بلاؤں ؟ انھوں نے کہا وہ سخت خو نہیں ہیں۔ پس میں نے جناب رسول اللہ (صلی اللہ علیہ وآلہ وسلم) کو آواز دی تو آپ باہر تشریف لائے اور ایک ریشمی جبہ پہن رکھا تھا اس میں سونے کا کڑھاؤ تھا اور فرمایا اے مخرمہ یہ جبہ میں نے تمہارے لیے چھپا کر رکھا تھا۔ وہ جبہ آپ نے مخرمہ کو دیا۔ امام طحاوی (رح) فرماتے ہیں : بعض لوگوں کا خیال ہے کہ ریشمی لباس میں کوئی حرج نہیں خواہ مرد پہنیں یا عورتیں اور انھوں نے اس روایت سے استدلال کیا ہے۔ دوسروں نے کہا انھوں نے ریشم کا پہننا مردوں کے لیے مکروہ قرار دیا اور آثار متواترہ سے جو نبی اکرم (صلی اللہ علیہ وآلہ وسلم) سے وارد ہوئے ہیں استدلال کیا۔
تخریج : بخاری فی اللباس باب ٤٤‘ مسلم فی اللباس ١٦‘ مسند احمد ٣؍٣٨٣۔
بعض لوگوں کا خیال یہ ہے کہ ریشم کا لباس مرد و عورت ہر ایک کے لیے درست ہے اس میں کوئی حرج نہیں۔
فریق ثانی کا قول یہ ہے کہ ریشم کا پہننا مکروہ تحریمی اور ممنوع ہے اس قول کو ائمہ احناف نے اختیار کیا ہے۔