Al Tahawi: Hadith 7166

٧١٦٣: عبیداللہ بن عبداللہ نے حضرت میمونہ (رض) سے اسی طرح روایت کی ہے۔ اگر عورت کو اپنے مال میں خاوند کی اجازت کے بغیر تصرف کا اختیار نہ ہو تو جناب رسول اللہ (صلی اللہ علیہ وآلہ وسلم) آزاد کردہ لونڈی کو واپس کراتے اور افضل ترین آزادی کی طرف لوٹاتے۔ اب کیونکر کسی کے لیے درست ہے کہ وہ کتاب اللہ کی ان دو آیات اور رسول اللہ (صلی اللہ علیہ وآلہ وسلم) سے صحیح ثابت شدہ سنن کو ترک کر کے ایک ایسی روایت کو اختیار کرے جو کہ شاذ و غیر ثابت ہے۔ پھر نظر کا تقاضا بھی یہی ہے۔ اس بارے میں کسی کو اختلاف نہیں کہ عورت اپنے مال کے ثلث میں وصیت کرسکتی ہے اور یہ وصیت تیسرا حصہ مال سے جائز ہے نافذ ہے جیسا کہ مردوں کے سلسلہ میں حکم اسی طرح ہے اس میں نہ تو مرد کو روکنے کا حق ہے اور نہ اس کے حکم کی ضرورت ہے۔ قرآن مجید نے یہی بات ارشاد فرمائی ہے۔ ” ولکم نصف ماترک ازواجکم “ (الایۃ آیت ١٢) اور اے خاوندو ! تمہیں اپنی بیویوں کے ترکہ سے نصف ملے گا اگر ان کے ہاں اولاد نہ ہو اگر اولاد ہو تو تمہیں اس مال میں سے چوتھائی ملے گا جو وہ چھوڑ جائیں اور یہ تقسیم ترکہ اس وصیت کے بعد نافذ ہوگا جو وہ وصیت کر جائیں یا قرض کے بعد۔ پس جب عورت کو اپنے ثلث مال کی وصیت جائز ہے اور وفات کے بعد وہ نافذ ہوگی تو زندگی کے دوران وہ اپنے مال میں اس سے زیادہ جائز حق رکھتی ہے ہم اسی کو اختیار کرتے ہیں اور یہ امام ابوحنیفہ ‘ ابو یوسف ‘ محمد رحمہم اللہ کا قول ہے۔