Al Tahawi: Hadith 7184

٧١٨١: حمید نے حضرت انس (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے انگور کی بیع سے اس وقت تک منع فرمایا یہاں تک کہ وہ سیاہ ہوجائیں اور دانے کی بیع سے منع فرمایا یہاں تک کہ وہ سخت ہوجائے۔ اس سے یہ دلالت مل گئی کہ دانے کی بیع سخت ہوجانے کے بعد درست ہے اگرچہ وہ اپنے سٹے میں ہو۔ اس کی دلیل یہ ہے کہ اگر اس کو تسلیم نہ کیا جائے تو اس طرح کہنا چاہیے :” حتی یشتد ویبراء من سنبلہ “ تھا کہ دانے سخت ہو کر اپنے سٹے سے باہر نکل آئے۔ اب ممنوعہ بیع کی انتہاء دانے کی سختی اور خشک ہوجانے کو قرار دیا تو اس سے یہ صاف دلالت مل گئی کہ اس کے بعد والے سودے کو اس کے بدء صلاح والے سودے پر قیاس نہیں کیا جاسکتا۔ تو جب سٹے کے اندر چھپے ہوئے دانے کی بیع سٹے کے بغیر جائز ہے تو یہ اس بات پر دلالت ہے کہ جس چیز کو بائع و مشتری نے نہ دیکھا ہو اس کی بیع جائز ہے بشرطیکہ وہ چیز اسی طرح معلوم و معین ہو جس طرح سٹے میں پوشیدہ دانہ معلوم و معین ہے اور وہ گندم ہے۔ اب جبکہ ہم اس روایت کی تاویل جان چکے اور دوسری روایت میں موافقت و مخالفت دونوں کا احتمال ہے تو ہم موافقت پر محمول کریں گے نہ کہ مخالفت پر (کیونکہ اصل مقصود تو روایات پر زیادہ سے زیادہ عمل ہے)
تخریج : ابو داؤد فی البیوع باب ٢٢‘ ترمذی فی البیوع باب ١٥‘ ابن ماجہ فی التجارات باب ٣٢‘ مسند احمد ٣؍٢٢١‘ ٢٥٠۔