١١١٢: ابوالابیض نے حضرت انس (رض) سے نقل کیا ہے کہ جناب رسول اللہ (صلی اللہ علیہ وآلہ وسلم) نماز عصر پڑھاتے اور سورج ابھی سفید بلند ہوتا۔ حضرت انس (رض) نے بتلایا کہ آپ (صلی اللہ علیہ وآلہ وسلم) نمازِ عصر کو ایسے وقت میں ادا کرتے جبکہ سورج سفید چمکدار ہوتا۔ پس یہ دلیل ہے کہ آپ اس کو مؤخر فرماتے پھر اس وقت میں اور غروب میں اتنا وقت ہوتا کہ آدمی ذوالحلیفہ وغیرہ تک جاسکتا تھا جن مقامات کا ان روایات میں تذکرہ آیا ہے اور حضرت انس (رض) سے بھی ایسی روایت وارد ہے۔
اللغات : محلقہ۔ ای مرتفعہ بلند۔
تخریج : نسائی فی الموقیت باب ٨‘ مسند احمد ٣؍١٣١‘ ١٦٩؍١٨٤‘ ٢٣٢۔
حاصل روایت ہذا :
جناب رسول اللہ (صلی اللہ علیہ وآلہ وسلم) نماز عصر ایسے وقت ادا فرما لیتے جب کہ سورج سفید بلند ہوتا یہ دلیل ہے کہ آپ اس کو مؤخر فرماتے پھر جس وقت میں نماز ادا فرماتے اس کے اور غروب کے درمیان اتنا وقت ہوتا جس میں سوار ذوالحلیفہ وغیرہ مقامات تک جاسکتا تھا۔