١١١٣: شعبہ نے ابو صدقہ مولیٰ انس (رض) سے نقل کیا ہے کہ ان (انس (رض)) سے اوقات نماز کے متعلق پوچھا گیا تو انھوں نے جواب دیا کہ جناب رسول اللہ (صلی اللہ علیہ وآلہ وسلم) تمہاری ان دونوں نمازوں کے درمیان نماز عصر ادا فرماتے۔ اس روایت میں یہ احتمال ہے کہ روایت کے الفاظ ((فی ما بین صلٰوتیکم ھاتین۔۔۔)) اس سے ظہر اور مغرب کی نمازیں مراد ہیں۔ یہ تاخیر عصر کی دلیل ہے اور یہ بھی کہا جاسکتا ہے کہ تمہاری عجلت اور تاخیر کے درمیان مراد ہے۔ پس یہ تاخیر کی دلیل بن گئی۔ مگر اس تاخیر سے سخت قسم کی تاخیر مراد نہیں۔ جب روایت میں مذکورہ احتمال پیدا ہوگیا اور ابو الابیض والی روایت کہ آپ نماز عصر کو ایسے وقت میں ادا فرماتے جب سورج سفید اور روشن ہوتا وہ تاخیر کو ثابت کر رہی ہے اگر کوئی اس کے متعلق یہ کہے کہ آپ اس سے تاخیر کیسے مراد لیتے ہیں جبکہ حضرت انس (رض) کی یہ روایت موجود ہے۔
تخریج : الحاکم فی الکنٰی ۔
فیما بین صلاتیکم ھاتین اس عبارت میں احتمالات ہیں۔
نمبر ١: تمہاری تعجیل و تاخیر کے درمیان اس سے تاخیر مراد ہے مگر تاخیر شدید مراد نہیں ہے۔
نمبر ٢: نماز ظہر اور مغرب کے درمیان کا وقت اور یہ تاخیر کی دلیل ہے۔ اور انس (رض) کی روایت میں مذکور ہے کہ جناب رسول اللہ (صلی اللہ علیہ وآلہ وسلم) اس کو اس وقت پڑھتے جب سورج سفید بلند ہوتا۔ اس سے ثابت ہوا کہ وہ اس کو مؤخر کرتے تھے۔
اشکال :
اس سے آپ تاخیر کس طرح مراد لیتے ہیں جبکہ حضرت انس (رض) سے تاخیر عصر کی شدید مذمت ثابت ہے جیسا کہ اس روایت میں ہے۔