١١٢٣: ابوالنجاشی نے بیان کیا کہ رافع بن خدیج (رض) کہتے ہیں کہ ہم عصر کی نماز جناب رسول اللہ (صلی اللہ علیہ وآلہ وسلم) کے ساتھ ادا کرتے پھر اونٹ ذبح کر کے اس کو دس حصوں میں تقسیم کرتے پھر پکا کر اس کا گوشت غروب آفتاب سے پہلے کھالیتے تھے۔ اس کو یہ کہا جائے گا کہ عین ممکن ہے وہ اس کام کو جلدی انجام دے لیتے ہوں اور عصر کو مؤخر پڑھتے ہوں ہمارے نزدیک اس روایت میں کوئی ایسی دلالت نہیں جو تاخیر عصر کے خلاف ہو۔ ہم باب المواقیت میں حضرت بریدہ کی روایت نقل کر آئے کہ انھوں نے پہلے دن عصر کی نماز اس حال میں پڑھی کہ سورج سفید بلند ‘ صاف ستھرا تھا اور دوسرے دن عصر کی نماز ایسے وقت میں پڑھی جب سورج بلند تھا یعنی اس کو پہلے دن سے زیادہ مؤخر کر کے پڑھا جبکہ آپ نے دونوں دنوں میں ہی مؤخر کر کے پڑھی اور اوّل وقت میں جلدی کر کے نہیں پڑھی جیسا کہ دوسری نمازوں میں آپ نے کیا۔ پس اس سے یہ بات ثابت ہوگئی کہ نماز عصر کے ادا کرنے کا وقت وہی ہے جس کی طرف تاخیر عصر والے لوگ گئے ہیں ‘ نہ وہ جس کی طرف تعجیل والے گئے۔ مکمل وضاحت مواقیت میں دیکھیں۔
تخریج : بخاری فی الشرکہ باب ١‘ مسلم فی المساجد حدیث نمبر ١٩٨‘ مسند احمد ٤؍١٤١‘ ١٤٢۔
حاصل روایت یہ نکلا کہ عصر اتنی پہلے پڑھی جاتی تھی جس میں یہ تمام کام پایہ تکمیل کو پہنچ جاتے تھے اور وہ وقت اول ہی ہے۔
الجواب : یہ تمام کام تیز رفتار والے لوگ اتنی دیر میں نپٹا لیتے ہیں آج کل بھی ماہر قصاب بیس منٹ میں گائے ذبح کر کے اس کے ٹکڑے بنا لیتا ہے جب دو تین آدمی ہوں گے تو وہ اس سے بھی کم وقت میں یہ کام انجام دے لیں گے پس یہ روایت تاخیر عصر کے خلاف حجت نہیں بن سکتی۔ فتدبر۔
ایک استدراک :
باب مواقیت الصلاۃ میں ہم نے حضرت بریدہ (رض) کی روایت ذکر کی جس میں اس بات کی وضاحت ہے کہ پہلے دن عصر کی نماز اس حال ادا فرمائی گئی کہ سورج بلندی پر تھا اور دوسرے دن عصر کی نماز پہلے دن کی نماز عصر سے زیادہ مؤخر کر کے ادا فرمائی اس روایت کے سیاق سے معلوم ہوا کہ فی الجملہ پہلے دن بھی عصر کو مؤخر کیا اور دوسرے دن تو پہلے دن کی بنسبت زیادہ مؤخر کیا۔
جس سے ثابت ہوا کہ دونوں دنوں میں عصر کی نماز فی الجملہ تاخیر سے ادا کی گئی اس کو اول وقت میں جلدی ادا نہیں فرمایا جیسا دوسری نماز میں کیا گیا پس اس سے ثابت ہوگیا کہ نماز عصر تاخیر مستحب کے ساتھ پڑھنا افضل ہے جس کی طرف ہمارے علماء گئے نہ کہ جس کی طرف دوسرے علماء کا رجحان ہے۔ واللہ اعلم۔
اس باب میں امام طحاوی (رح) نے اپنے انداز سے تاخیر عصر کی افضلیت کو ثابت کیا اور اس کے لیے روایات کے علاوہ اپنی عادت کے مطابق آثار صحابہ وتابعین سے بھی دلیل پیش کی ہے نظر طحاوی سے بھی کام لیا ہے۔