١١٨٣: عکرمہ نے ابن عباس (رض) سے مروی ہے کہ میں نے آپ کے طریقہ کو خوب محفوظ کیا مگر مجھے یہ معلوم نہیں ہوسکا کہ کیا رسول اللہ (صلی اللہ علیہ وآلہ وسلم) ظہر و عصر میں قراءت پڑھتے تھے یا نہیں۔ یہ ابن عباس (رض) ہیں جو یہ بتلا رہے ہیں کہ ظہر و عصر میں قراءت نہ کرنا میرے نزدیک ہرگز ثابت نہیں اور ان سے پہلی روایت جو نقل کی گئی اس میں ابن عباس (رض) نے قراءت کے ترک کا حکم دیا یا اس لیے کہ جناب رسول اللہ (صلی اللہ علیہ وآلہ وسلم) نے ان میں قراءت نہیں کی۔ پس اس روایت میں اس بات کے ثبوت کی نفی ہوگئی تو اس روایت میں جو کہا گیا اس کی خود نفی ہوگئی کیونکہ دیگر صحابہ کرام (رض) کے ہاں تو ان کی قراءت ثابت شدہ ہے جس کا تذکرہ ہم آئندہ روایات میں کر رہے ہیں پھر حضرت ابن عباس (رض) کا اپنا فتویٰ اس کے خلاف موجود ہے تو ان کے فتاویٰ جات ملاحظہ ہوں۔
تخریج : ابو داؤد فی الصلاۃ باب ١٢٧‘ نمبر ٨٠٩۔
یہ روایت صاف بتلا رہی ہے کہ ابن عباس (رض) کو ظہر و عصر کی قراءت کی تحقیق نہ تھی تو ان کا ترک قراءت کا قول اس وقت کا ہے جب ان سے عدم تحقیق کی بات ثابت ہوگئی تو عدم قراءت والی بات بھی عدم ہوگئی کیونکہ ان کے علاوہ صحابہ کرام کو تحقیق تھی کہ آپ ظہر و عصر میں قراءت کرتے تھے جیسا چند سطور بعد روایات مذکور ہیں اگر اس بات سے قطع نظر بھی کرلی جائے تو ابن عباس (رض) سے اس روایت کے خلاف بات بھی دکھائی جاسکتی ہے۔
جواب نمبر ٢: روایت ابن عباس (رض) ملاحظہ ہو۔