١٢٢٨: حضرت انس (رض) نے ام الفضل بنت الحارث سے روایت کی ہے وہ کہتی ہیں ہمیں جناب رسول اللہ (صلی اللہ علیہ وآلہ وسلم) نے اپنے گھر میں نماز مغرب پڑھائی جبکہ آپ ایک کپڑے میں لپٹے ہوئے تھے اور آپ نے اس میں سورة مرسلات کی تلاوت فرمائی آپ نے اس طرح جماعت کے ساتھ کوئی نماز ادا نہیں فرمائی یہاں تک کہ آپ کی وفات ہوگئی۔ ایک جماعت نے ان روایات کو اپنایا اور اختیار کیا جبکہ دوسروں نے کہا کہ نماز مغرب میں قصار مفصل پڑھیں ‘ اس لیے کہ یہ کہنا درست ہے کہ آپ نے طور پڑھی یعنی اس کا بعض حصہ پڑھا اور یہ اطلاق لغت میں درست ہے جیسے محاورے میں کہتے ہیں فلاں قرآن پڑھتا ہے جبکہ وہ اس میں سے کچھ پڑھتا ہو اور یہ بھی احتمال ہے کہ پوری سورت مراد ہو ہم نے غور کیا کہ کیا کوئی روایت ایسی موجود ہے جو اس پر دلالت کرتی ہو چنانچہ یہ روایت مل گئی۔
تخریج : ترمذی فی الصلاۃ باب ١١٣‘ نمبر ٣٠٨‘ نسائی فی الافتتاح باب ٦٤۔
اللغات : متوشحًا چادر کے دونوں کناروں کو دائیں ہاتھ کے نیچے سے نکال کر بائیں کندھے پر ڈال کر پھر دونوں کناروں کو سینے پر باندھنا۔
حاصل روایات : ان روایات و آثار سے معلوم ہوتا ہے کہ مغرب کی نماز میں سورة طور ‘ مرسلات ‘ اعراف ‘ یٓسین جیسی سورتیں پڑھی جائیں ان کو پڑھنا افضل ہے کچھ علماء نے ان آثار سے استدلال کر کے ان کی پیروی کی جیسا کہ امام شافعی و دیگر علماء کا مؤقف ہے۔
مؤقف فریق دوم :
نماز مغرب میں قصار مفصل کو پڑھا جائے گا اس کو احناف و حنابلہ نے اختیار کیا ہے۔
مستدل روایات کے پیش کرنے سے پہلے سابقہ روایات کے جواب ذکر کرتے ہیں۔
روایت جبیر بن مطعم (رض) کا جواب : آپ (صلی اللہ علیہ وآلہ وسلم) نے طور پڑھی اس میں دو احتمال ہیں۔
نمبر ١: پوری سورة طور پڑھی تو مدعا ثابت ہے اور اسی کو سامنے رکھ کر فریق اوّل نے استدلال کیا۔
نمبر ٢: سورة طور کا بعض حصہ تلاوت فرمایا اور کل بول کر جز مراد لینے کی بات تو کلام عرب میں شائع وذائع ہے۔
ان دونوں احتمالوں میں تعیین کے لیے روایات و آثار کو چھاننے سے یہ روایت نکل آئی۔