١٢٢٩: محمد بن جبیر بن مطعم نے حضرت جبیر بن مطعم سے بیان کیا کہ میں جناب رسول اللہ (صلی اللہ علیہ وآلہ وسلم) کے زمانہ میں بدر کے قیدیوں کے سلسلہ میں بات چیت کرنے کے لیے مدینہ منورہ حاضر ہوا اس وقت آپ اپنے صحابہ کو نماز مغرب پڑھا رہے تھے میں نے سنا کہ آپ پڑھ رہے تھے : ان عذاب ربک لواقع [الطور : ٧] یہ سن کر ایسے محسوس ہوا جیسے میرا دل پھٹ گیا ہو جب آپ فارغ ہوئے تو میں نے قیدیوں کے سلسلے میں آپ سے بات چیت کی تو آپ نے فرمایا اگر بوڑھا میرے پاس آتا تو میں اس کی سفارش قبول کرتا (اس سے مراد مطعم بن عدی تھا) ھُشیم نے اس روایت کو زہری سے نقل کیا اور انھوں نے واقعہ صحیح انداز سے بیان کر کے بتلا دیا کہ جناب رسول اللہ (صلی اللہ علیہ وآلہ وسلم) سے انھوں نے جو قراءت سنی ہے وہ یہ ہے کہ : { ان عذاب ربک الواقع } پس اس روایت نے واضح کردیا کہ پہلی روایت میں طور سے مراد طور کی وہ آیات ہیں اور حبیبہ (رض) کے الفاظ وہی ہیں جو ھشیم سے نقل کئے کیونکہ ھشیم نے قصہ کو صحیح انداز سے بیان کیا ہے۔ پس جو قراءت انھوں نے بیان کی اس سے خاص آیت { ان عذاب ربک الواقع } مراد ہے ‘ مالک کی روایت ویسے مختصر ہے۔ اسی طرح زید بن ثابت نے جو بات مروان کو فرمائی کہ میں نے جناب رسول اللہ (صلی اللہ علیہ وآلہ وسلم) سے طوال میں سب سے طویل طوال کو پڑھتے سنا وہ سورة { الٓمصٓ} ہے اور یہ کہنا بھی درست ہے کہ اس سے بعض کا پڑھنا مراد ہو ‘ اس کی دلیل یہ روایات ہیں۔
تخریج : روایت نمبر ١٢٢٠ کی تخریج ملاحظہ ہو۔
نمبر ١: اس روایت کو ہشیم نے صحیح طریق سے بیان کردیا اور بتلایا کہ جبیر نے جناب نبی اکرم (صلی اللہ علیہ وآلہ وسلم) سے یہ آیت ان عذاب ربک لواقع سنی تھی پس جبیر کی مراد یہی آیت تھی پوری سورت مراد نہ تھی۔
نمبر ٢: حدیث الباب مراد ہے مالک کی روایت بھی مختصر ہے گویا روایت میں جز بول کر کل مراد لیا گیا ہے پس طول قراءت پر اس سے استدلال درست نہیں ہے۔
نمبر ٣: اسی طرح حدیث حضرت زید بن ثابت (رض) جو مروان کو کہی گئی اس میں بھی الٓمصٓ کا جز پڑھنا مراد ہے ساری سورت مراد نہیں ہے۔
روایت کی جو تاویل ہم نے پیش کی ہے اس کی صداقت پر بطور استشہاد یہ روایات ملاحظہ ہوں۔