١٢٥٤: معاویہ بن صالح نے ابوالزاہریہ عن کثیر بن مرہ عن ابی الدردائ (رض) سے روایت کی ہے کہ ایک آدمی نے کہا یارسول اللہ (صلی اللہ علیہ وآلہ وسلم) کیا ہر نماز میں قرآن مجید پڑھنا لازم ہے آپ نے فرمایا ہاں۔ ایک انصاری نے کہا پھر تو قرآن مجید پڑھنا واجب ہوا۔ یہ حضرت ابو الدرداء (رض) ہیں جنہوں نے جناب رسول اللہ (صلی اللہ علیہ وآلہ وسلم) سے سنا کہ تمام نمازوں میں قرآن مجید پڑھنا چاہیے تو ایک انصاری نے کہا پھر تو واجب ہوگیا تو آپ (صلی اللہ علیہ وآلہ وسلم) نے اس کی بات کا انکار نہیں کیا پھر ابو الدرداء (رض) نے اس کی بات کے بعد اپنی رائے ظاہر فرمائی کہ یہ حکم اکیلے نماز پڑھنے والے اور امام کے لیے ہے مقتدیوں کے لیے نہیں ‘ حضرت ابوہریرہ (رض) کی رائے ان سے مختلف ہے وہ اسے مقتدی بمع امام پر لازم کرتے ہیں ‘ پس اس روایت کا کسی بھی فریق کے لیے دلیل ہونا ثابت نہ ہوسکا ‘ باقی رہی حدیث عبادہ (رض) ‘ تو انھوں نے بات کو واضح کردیا کہ جناب رسول اللہ نے مقتدیوں کو اپنے پیچھے فاتحہ پڑھنے کا حکم دیا ہم یہ چاہتے ہیں کہ یہ دیکھیں کہ ان کے خلاف اور کسی صحابی نے عمل کیا یا نہیں تو چنانچہ یہ روایات مل گئیں۔
فتویٰ :
ابوالدردائ (رض) کہتے ہیں میرے خیال میں جب کوئی کسی قوم کی امامت کروائے تو اس کی قراءت ان کے لیے کافی ہے۔
تخریج : نسائی فی الافتتاح باب ٣١‘ ١؍١٤٦۔
یہ حضرت ابوالدردائ (رض) جو اس حدیث کے راوی ہیں انھوں نے خود زبان نبوت سے ” فی کل صلوۃ قرآن “ کا ارشاد سنا اس پر ایک انصاری نے قراءت کے وجوب کا قول کیا تو آپ (صلی اللہ علیہ وآلہ وسلم) نے انکار نہیں فرمایا گویا یہ سکوت بھی بیان ہوگیا پھر ابوالدردائ (رض) نے اس کے بعد یہ فتویٰ دیا کہ جو اکیلا نماز پڑھے یا امام ہو اس پر یہ حکم ہے مقتدی کا حکم یہ نہیں ہے۔
اب بنظر انصاف دونوں صحابیوں کے فتوے مختلف ہوئے تو ابوالدردائ (رض) کے فتویٰ کو ” من کان لہ امام فقراء ۃ الامام لہ قراء ۃ “ کے موافق ہونے کی وجہ سے ترجیح ہوگی۔
جواب روایت :
عبادہ بن الصامت (رض) کی روایت سند کے لحاظ سے کمزور ہے مکحول مدلس اور محمود بن الربیع مجہول ہے۔
نمبر ": مکحول کبھی خود عبادہ سے کبھی محمود بن الربیع کے واسطہ سے کبھی نافع ابن محمود کے واسطہ سے کبھی نافع ابن محمود عن محمود ابن الربیع کے واسطہ سے کبھی نافع ابن محمد عن ابی نعیم عن ابی عبادہ سے نقل کرتے ہیں اس شدید اضطراب کی وجہ سے قابل استدلال نہیں متن میں بھی اضطراب ہے کبھی لا صلوۃ الابفاتحۃ الکتاب کبھی لا صلوۃ لمن لم یقرء بامّ القرآن خلف الامام کبھی لا صلوۃ لمن لم یقرأبھا ہے گویا متن بھی مضطرب پس قابل استدلال نہیں۔ یہ صحیح روایت مالی انازع القرآن کے خلاف ہے اسی طرح اذا قریء القرآن فاستمعوالہ کے خلاف ہے نیز اس کے بعض طرق امام و منفرد کے ساتھ اس کو خاص کرتے ہیں جس کے لیے جواب کی حاجت نہیں۔
مؤقف ثانی :
امام کے پیچھے کسی قسم کی قراءت نہیں ان کی مستدل یہ روایات و آثار ہیں۔