١٢٥٥: ابن اکیمہ لیثی نے ابوہریرہ (رض) سے نقل کیا کہ جناب رسول اللہ (صلی اللہ علیہ وآلہ وسلم) نماز جہری سے واپس مڑے تو ارشاد فرمایا کیا تم میں سے کسی نے میرے ساتھ ابھی پڑھا ہے تو ایک آدمی نے کہا جی ہاں یارسول اللہ (صلی اللہ علیہ وآلہ وسلم) اس پر جناب رسول اللہ (صلی اللہ علیہ وآلہ وسلم) نے فرمایا میں بھی کہہ رہا ہوں میرے ساتھ قرآن مجید کے پڑھنے میں کیوں منازعہ کیا جا رہا ہے حضرت ابوہریرہ (رض) کہتے ہیں اس پر لوگ جناب رسول اللہ (صلی اللہ علیہ وآلہ وسلم) کے ساتھ ساتھ جہری نمازوں میں پڑھنے سے رک گئے جب انھوں نے آپ (صلی اللہ علیہ وآلہ وسلم) کا یہ ارشاد سنا۔
تخریج : ترمذی فی الصلاۃ باب ١١٦‘ نمبر ٣١٢‘ نسائی فی الافتتاح باب ٢٨‘ ابن ماجہ فی الاقامہ باب ١٣‘ مالک فی النداء نمبر ٤٤‘ مسند احمد ٢؍٢٨٤۔
حاصل روایات : اس روایت سے معلوم ہوتا ہے کہ صحابہ (رض) کی جماعت میں اور کوئی بھی نہیں پڑھتا تھا جس ایک شخص نے پڑھا اس نے استفسار پر بتلا دیا اس کو بھی بات بتلا دی گئی تو پھر جو بعض افراد پڑھتے تھے وہ بھی رک گئے معلوم ہوتا ہے اگر فاتحہ خلف الامام ہوتی تو سب پڑھتے۔ فتدبر۔