١٣٠١: ابو سلمہ کہتے ہیں کہ میں نے حضرت ابوہریرہ (رض) کو نماز میں ہر حفض و رفع میں تکبیر کہتے پایا ہے میں نے ان سے استفسار کیا اے ابوہریرہ (رض) ! یہ کیا نماز ہے ؟ تو وہ فرمانے لگے بیشک یہی جناب رسول اللہ (صلی اللہ علیہ وآلہ وسلم) کی نماز ہے (آپ (صلی اللہ علیہ وآلہ وسلم) کے مشابہ نماز ہے) جناب نبی اکرم (صلی اللہ علیہ وآلہ وسلم) سے نقل کیے جانے والے آثار ہر جھکنے اور اٹھنے کے وقت تکبیر کو کھلے طور پر ثابت کر رہے ہیں ان کے مقابلہ میں عبد الرحمن بن ابزی کی روایت کم درجہ ہے۔ ان روایات پر ابوبکر و عمر (رض) کا عمل اور آج تک کا متواتر عمل ہے جس کا کوئی منکر اور ردّ کرنے والا انکار نہیں کرسکتا۔ پھر نظر و فکر بھی اس پر گواہ ہیں۔ ہم دیکھتے ہیں کہ نماز میں تکبیر سے داخل ہوتے ہیں پھر رکوع و سجود سے انتقال بھی تکبیر کے ذریعے ہے۔ اسی طرح قعدہ قیام بھی تکبیر سے ہوگا۔ ان احوال کی تکبیر سب کے ہاں بالاتفاق ہے۔ تو اٹھنے اور جھکنے میں بھی ان پر قیاس کرتے ہوئے تکبیر ہوگی۔ یہ امام ابوحنیفہ ‘ ابو یوسف و محمد (رح) کا قول ہے۔
تخریج : مسلم فی الصلاۃ نمبر ٣١۔
حاصل روایات : یہ تمام روایات و آثار جناب رسول اللہ (صلی اللہ علیہ وآلہ وسلم) کے اقوال و افعال ہیں اور پھر آپ کے بعد خلفائے راشدین نے ان کو اپنایا ہے پس ان روایات کو لے کر عمل کرنا عبدالرحمن بن ابزیٰ کی مجمل روایت سے اولیٰ و اعلیٰ ہے اور یہ عمل تواتر سے ہم تک پہنچا ہے جس کا کوئی منکر انکار نہیں کرسکتا اور نہ کوئی دلیل اس کا مقابلہ کرسکتی ہے پس دلائل قاہرہ سے ہر خفض و رفع کی تکبیر ثابت ہوگئی۔
نظر طحاوی (رح) :
پھر عقل و فکر بھی اس کے شاہد ہیں وہ اس طرح کہ نماز میں ہم تکبیر افتتاح سے داخل ہوتے ہیں پھر رکوع اور سجود سے فراغت بھی تکبیر سے حاصل ہوتی ہے اسی طرح قیام و قعود سے بھی انتقال تکبیر سے ہوتا ہے تو یہ تمام حالات جن میں ہم ایک ہیئت سے دوسری ہیئت کی طرف منتقل ہوتے ہیں وہ جب تمام تر تکبیر سے ہے اور فریق مخالف کے ہاں بھی نیچے سے اوپر کی طرف منتقل ہونے کے لیے تکبیر ہے تو نظر و فکر کا تقاضا یہ ہے کہ تغیر احوال میں قیام سے رکوع اور رکوع سے سجدہ کی طرف جھکتے ہوئے بھی تکبیر ہونی چاہیے ورنہ تفریق کی کیا وجہ ہے پس ثابت ہوا ہے کہ نیچے سے قیام کی طرف اٹھتے وقت جب تکبیر ہے تو اوپر سے نیچے کی طرف رجوع وغیرہ کے لیے جھکتے وقت بھی تکبیر ہے۔
یہی ہمارے علماء و ائمہ ثلاثہ امام ابوحنیفہ (رح) و ابو یوسف (رح) اور محمد (رح) کا مسلک ہے اور جمہور فقہاء و محدثین بھی اسی طرف گئے ہیں۔
نوٹ : اس باب میں فریق اوّل کی ایک دلیل ذکر کر کے اس کی نہایت کمزوری کی طرف اشارہ کردیا اور جمہور کے دلائل کو بڑی قوت و زور سے پیش کیا اور معمول کے مطابق آخر میں نظر سے ثابت کردیا خلفاء راشدین کے عمل کو مسلمات کے طور پر پیش کیا۔