١٣٢٤: حمید نے انس (رض) سے نقل کیا کہ جناب رسول اللہ (صلی اللہ علیہ وآلہ وسلم) اس بات کو پسند فرماتے کہ مہاجرین و انصار آپ کے قریب ہوں تاکہ وہ آپ کی باتیں آپ سے خوب یاد کرلیں۔
تخریج : مسلم فی الصلاۃ ١٢٢؍١٢٣‘ ابو داؤد فی الصلاۃ باب ٩٥‘ نمبر ٦٧٤‘ ترمذی فی المواقیت باب ٥٤‘ نسائی فی الاقامۃ باب ٢٣‘ ٢٤‘ ابن ماجہ فی الاقامۃ باب ٤٥۔ دارمی فی الصلاۃ باب ٥١‘ مسند احمد ١؍٤٥٧‘ ٤؍١٢٢۔
اسی طرح ابو بکرہ نے عبداللہ بن بکر سے انھوں نے اپنی سند سے اسی طرح کی روایت نقل کی ہے۔
مہاجرین اور انصار کے قریب تر رہنے کی مؤید روایات۔
طحاوی (رح) کہتے ہیں جناب رسول مقبول (صلی اللہ علیہ وآلہ وسلم) کا یہ ارشاد لیلینی منکم اولوا الاحلام والنہٰی اس کا مؤید ہے اس کو ابی معمر نے ابو مسعود (رض) سے اس طرح نقل کیا ہے ملاحظہ ہو۔