١٣٥٨: علی بن یحییٰ نے اپنے چچا رفاعہ بن رافع (رض) سے ذکر کیا کہ نبی اکرم (صلی اللہ علیہ وآلہ وسلم) مسجد میں تشریف فرما تھے چنانچہ ایک آدمی داخل ہوا اور اس نے نماز کی ادائیگی اس حال میں کی کہ جناب رسول اللہ (صلی اللہ علیہ وآلہ وسلم) اس کی طرف دیکھ رہے تھے آپ نے اسے فرمایا جب تم اپنی نماز میں کھڑے ہوجاؤ تو تکبیر کہو پھر اگر تمہیں قرآن مجید آتا ہو تو وہ پڑھو اگر تمہیں قرآن مجید بالکل نہ آتا ہو تو اللہ تعالیٰ کی حمد کرو الحمد للہ ‘ اللہ اکبر ‘ لا الٰہ الا اللہ پڑھو پھر رکوع کرو یہاں تک کہ تم رکوع میں مطمئن ہوجاؤ پھر اٹھو یہاں تک کہ بالکل سیدھے ہوجاؤ پھر سجدہ کرو یہاں تک کہ سجدہ میں مطمئن ہوجاؤ پھر بیٹھ جاؤ یہاں تک کہ اطمینان ہوجائے جب تم نے ایسا کردیا تو تمہاری نماز مکمل ہوگئی اور جو اس میں سے تم کم کرو گے وہ اپنی نماز سے کم کرو گے۔
تخریج : ابو داؤد فی الصلاۃ باب ١٤٤‘ ٨٥٩؍٨٦١‘ ترمذی فی المواقیت باب ١١٠‘ نمبر ٣٠٢‘ نسائی فی التطبیق باب ١٥‘ والسہو باب ١٧‘ مسند احمد ٤؍٣٤٠‘ مستدرک حاکم ١؍٢٤١؍٢٤٢‘ بیہقی فی السنن الکبرٰی ٢؍١٠٢؍١٣٣‘ ٣٤٥؍٣٨٠۔