١٥٠٦: محمد بن عمرو بن عطاء نے بنی مالک کے کسی آدمی سے اس نے عیاش یا عباس بن سہل ساعدی سے بیان کیا کہ میں ایک مجلس میں تھا جس میں میرے والد بھی موجود تھے میرے والد خود صحابی رسول اللہ (صلی اللہ علیہ وآلہ وسلم) ہیں اور اس مجلس میں ابوہریرہ ‘ ابواسید ‘ ابو حمیدالساعدی (رض) انصار میں سے تھے انھوں نے باہمی نماز کا مذاکرہ کیا تو ابو حمید نے کہا میں تم میں سب سے بڑھ کر جناب رسول اللہ (صلی اللہ علیہ وآلہ وسلم) کی نماز کو جاننے والا ہوں انھوں نے کہا یہ کیسے ؟ تو وہ کہنے لگے میں نے جناب رسول اللہ (صلی اللہ علیہ وآلہ وسلم) سے حاصل کی ہے انھوں نے کہا ہمیں دکھلاؤ چنانچہ ابو حمید کھڑے ہو کر نماز پڑھنے لگے اور وہ تمام دیکھ رہے تھے انھوں نے نماز کی ابتداء میں کندھوں کے برابر ہاتھوں کو بلند کیا پھر رکوع کی تکبیر کہی اور اپنے ہاتھوں کو بلند کیا پھر اپنے ہاتھوں سے گھٹنوں کو مضبوطی سے تھام لیا سر کو نہ تو کمر سے بلند کرنے والے اور نہ نیچے جھکانے والے تھے (بلکہ برابر رکھنے والے تھے) پھر رکوع سے سر اٹھایا اور سمع اللہ لمن حمدہ اللہم ربنا ولک الحمد کہا پھر رفع یدین کیا پھر اللہ اکبر کہہ کر سجدہ میں چلے گئے اور سجدہ میں اپنی ہتھیلیوں کے سہارے دونوں گھٹنوں اور پاؤں کو کھڑا رکھا پھر تکبیر کہی اور جلسہ کیا اور ایک پاؤں کو کھڑا رکھا جبکہ دوسرے سے تورک کیا پھر تکبیر کہہ کر دوسرا سجدہ کیا اور تکبیر کہہ کر قیام کے لیے اٹھ گئے اور تورک نہ کیا۔ پھر دوسری رکعت کی قراءت پوری کر کے رکوع کیا اور اسی طرح تکبیر کہی پھر دو رکعت کے بعد بیٹھے جب قیام کے لیے اٹھنے کا ارادہ کیا تو تکبیر کہہ کر کھڑے ہوگئے پھر دو رکعت مکمل کر کے دائیں جانب سلام پھیرتے ہوئے السلام علیکم و رحمۃ اللہ اور بائیں طرف السلام علیکم و رحمۃ اللہ کہا۔
تخریج : ابو داؤد فی الصلاۃ باب ١١٦‘ نمبر ٧٣٠‘ بیہقی ٢؍١٤٦‘ تخریج روایت ١٥٠٥ ملاحظہ ہو۔