١٦٣٥: عبداللہ بن شقیق نے بتلایا کہ میں نے عائشہ (رض) سے جناب رسول اللہ (صلی اللہ علیہ وآلہ وسلم) کی رات کی نماز سے متعلق سوال کیا تو وہ کہنے لگیں جب آپ لوگوں کو عشاء کی نماز پڑھا لیتے گھر میں داخل ہو کر دو رکعت نماز ادا فرماتے پھر رات کو نو رکعت نماز ادا فرماتے جن میں وتر تین عدد بھی ہوتے (جیسا گزشتہ روایت میں گزرا) جب فجر طلوع ہوتی تو میرے گھر میں دو رکعت نماز ادا فرماتے پھر لوگوں کو فجر کی نماز پڑھانے کے لیے باہر تشریف لاتے۔ اس روایت میں اس طرح فرمایا کہ جب آپ رات کو گھر تشریف لاتے تو دو رکعت ادا فرماتے اور رات کو نو رکعت اور فرماتے جن میں وتر بھی ہوتے تھے۔ یہ نو رکعات ہمارے ہاں ان دو کے علاوہ ہیں جن کو ہلکا پھلکا ادا فرماتے۔ جیسا سعد بن ہشام نے حضرت عائشہ صدیقہ (رض) سے نقل کیا کہ جناب رسول اللہ (صلی اللہ علیہ وآلہ وسلم) اپنی رات کی نماز دو خفیف رکعات سے شروع فرماتے۔ ہم عبداللہ بن شقیق کی روایت کا یہ معنی کیا ہے تاکہ یہ روایت اور سعد بن ہشام کی روایت میں تضاد نہ رہے۔
تخریج : مسند احمد ٦؍٣٠۔
حاصل روایات : اس روایت سے معلوم ہو رہا ہے کہ عشاء کے بعد آپ دو رکعت گھر میں داخل ہو کر پڑھتے اور رات کو ٩ رکعت ادا فرماتے جن میں وتر بھی تھے ہمارے ہاں اس روایت میں ٩ سے مراد ان دو کے علاوہ ہیں جن کو سعد بن ہشام نے حضرت عائشہ (رض) سے ذکر فرمایا ہے کہ جناب رسول اللہ (صلی اللہ علیہ وآلہ وسلم) رات کی نماز کو دو ہلکی پھلکی رکعات سے شروع فرماتے جیسا کہ عبداللہ بن شقیق والی روایت ہے تاکہ روایات میں اختلاف نہ رہے اور سعد بن ہشام کی روایت سے اس کا معنی موافق ہوجائے۔
ابو سلمہ بن عبدالرحمن کی عائشہ (رض) سے روایت ملاحظہ ہو۔