١٦٥٢: یحییٰ بن جزار نے حضرت عائشہ (رض) سے ‘ انھوں نے جناب نبی کریم (صلی اللہ علیہ وآلہ وسلم) سے اسی طرح کی روایت نقل کی ہے۔ اس روایت میں ہے کہ آپ کے وتر نو رکعت تھے البتہ فہد نے ابراہیم سے جو روایت کی وہ اس سے مختلف ہے۔ امام طحاوی فرماتے ہیں کہ میرے خیال میں اسود نے حضرت عائشہ صدیقہ (رض) سے اس طرح نقل کیا کہ آپ کی نماز رات کو نو رکعت ہوا کرتی تھی۔ تو اس روایت میں اس طرح ہے کہ آپ کی رات والی نماز نو رکعت تھی۔ اس نے اسود والی روایت کی مخالفت کی ہے۔ اس میں یہ احتمال ہے کہ وہ تمام نماز جس کو اس نے وتر سے تعبیر کیا ہے وہ وتر سمیت مکمل نماز تھی اور اس کی دلیل یحییٰ کی روایت میں ہے کہ آپ کی ضعف سے پہلے کی نماز نو رکعت تھی جب آپ کو بڑھاپا آگیا تو آپ نے سات رکعت ادا فرمائیں۔ پس یہ ہشام کی اس روایت کے موافق ہوگئی جس میں آٹھ رکعات کا تذکرہ جن کو پہلے ادا فرماتے اور پھر ایک ملا کر ان کو وتر بنا لیتے۔ پھر جب آپ کا جسم بھاری ہوگیا تو آپ نے ان آٹھ کو چھ میں بدل دیا اور ایک ملا کر سات کو وتر بنا لیا۔ یہ اس طور پر ہے کہ آپ کی تمام نماز جس میں وتر بھی شامل تھے انھوں نے اس کا نام وتر رکھا تاکہ یہ آثار متفق ہو کہ ان میں تضاد جاتا رہے۔ البتہ اتنی بات رہے گی کہ وتر کی حقیقت پر روشنی زرارہ کی روایت کے بغیر نہیں پڑ سکتی۔ پس ہم نے اس میں غور و فکر کیا کہ آیا کوئی روایت ایسی ملتی ہے جس میں وتر کی کیفیت مذکور ہو تو یہ روایات مل گئیں۔
تخریج : نسائی ١؍٢٤٩۔
حاصل روایات : ان روایات سے وتر کی تعداد نو معلوم ہو رہی ہے البتہ فہد کی روایت جو حسن بن ربیع عن ابوالاحوص عن اعمش ہے اس میں بقول طحاوی (رح) ابراہیم عن اسود عن عائشہ (رض) یہ ہے کہ آپ (صلی اللہ علیہ وآلہ وسلم) رات کو نو رکعات پڑھا کرتے تھے۔ تو اس روایت نے ظاہر کردیا کہ آپ کی رات کے وقت ادا کی جانے والی نماز کی رکعات کل نو تھیں پس یہ اسود کی پہلی روایات سے مختلف ہوئی۔
اس میں ایک احتمال یہ ہے کہ وہ تمام رکعات جو رات کے وقت آپ (صلی اللہ علیہ وآلہ وسلم) ادا فرماتے ان کو وتر کہہ دیا گیا ان میں نفل و وتر سب شامل تھے (٦ نفل ٣ وتر) اس کی دلیل یحییٰ بن جزار کی روایت ہے آپ پر بڑھاپا آنے سے پہلے نو رکعات ادا فرماتے رہے جب آپ کی عمر بڑھاپے والی آگئی تو آپ سات رکعت ادا فرمانے لگے اب اس طرح یہ روایت سعد بن ہشام کی آٹھ رکعت والی اس روایت کے موافق ہوگئی جس میں مذکور ہے کہ پہلے آپ آٹھ رکعت ادا فرماتے رہتے پھر ایک کو ملاکر وتر بنا لیتے پس جب آپ کا جسم مبارک بوجھل ہوگیا تو آٹھ کو چھ سے بدل لیا اور ساتویں سے وتر بنانے لگے (٤ نفل تین وتر)
نوٹ پس اس سے یہ دلالت مل گئی کہ آپ کی رات والی تمام نماز کو وتر سے تعبیر کردیا یہ تسمیۃ الکل باسم الجزء کی قسم سے ہے ان سات رکعات میں وتر بھی تھے تاکہ ان آثار میں تضاد واقع نہ ہو اور جو بظاہر پیدا ہو رہا ہے وہ ختم ہوجائے۔
کیفیت وتر :
اب تک جس قدر روایات گزر چکیں ان میں حقیقت وتر سے آگاہی نہیں ہوئی البتہ صرف روایت زرارہ بن اوفی عن سعد بن ہشام میں یہ مذکور ہے ہم یہاں اور روایات بھی پیش کرتے ہیں جو کیفیت وتر کی نشاندہی کریں گی۔