١٦٥٣: یحییٰ بن سعید نے عمرہ بنت عبدالرحمن سے اور انھوں نے حضرت عائشہ (رض) سے نقل کیا کہ جناب رسول اللہ (صلی اللہ علیہ وآلہ وسلم) ان دو رکعتوں میں جن میں آخرری رکعت کو ملا کر وتر بنانا ہوتا تو اول میں سبح اسم ربک الاعلٰی دوسری میں قل یا ایھا الکافرون اور تیسری جس سے ان کو وتر بناتے اس میں کمل ھو اللہ احد اور قل اعوذ برب الفلق اور قل اعوذ برب الناس پڑھتے تھے۔
سنت ِفجر کی قراءت
حاصل روایت :: نماز فجر سے پہلے دو رکعت نماز واجب ہے یا سنت ‘ حسن بصری (رح) اس کو واجب کہتے ہیں جبکہ تمام ائمہ اس کو سنت کہتے ہیں فجر کی ان دو رکعتوں میں امام مالک صرف فاتحہ پڑھتے اور دیگر تمام ائمہ سورة فاتحہ اور سورة کا پڑھنا فرماتے ہیں شافعی (رح) و احمد (رح) تو پڑھنے کو لابأس بہ قرار دیتے ہیں اور احناف قراءت کو واجب مانتے ہیں۔
مؤقف فریق اوّل و ثانی : امام حسن بصری (رح) بالکل قراءت نہ کرنے کے قائل ہیں جبکہ امام مالک (رح) صرف فاتحہ کے قائل ہیں۔ روایات یہ ہیں۔