١٦٥٧ : ابن مسیب نے حضرت عائشہ صدیقہ (رض) سے نقل کیا آپ کے وتر سات ‘ پانچ ‘ تین رکعت تھے اور تین رکعت بتیرا ہیں۔ حضرت عائشہ صدیقہ (رض) نے اس بات کو ناپسند کیا کہ صرف وتر تین ادا کرے اور ان سے پہلے کچھ نفل نہ پڑھے۔ جب ان کے نزدیک بہترین وتر وہ ہیں جن سے قبل نفل چار رکعت یا دو رکعت ہو ‘ انھوں نے اس طرح جناب رسول اللہ (صلی اللہ علیہ وآلہ وسلم) کی رات والی نماز کو جمع کر کے تمام کو وتر کہا۔ مگر اس کے ضمن میں یہ بات ثابت ہوگئی کہ وتروں کی تین رکعات ہیں۔ پس حضرت عائشہ صدیقہ (رض) کی اس مرفوع روایت سے وہی بات ثابت ہوئی۔ تو سعد بن ہشام نے حضرت صدیقہ (رض) سے نقل کی ہے۔ کیونکہ ان کا قول ان کے اجتہاد کے موافق ہے۔ اس سے یہ بات ثابت ہوگئی کہ وتر تین ہیں اور ان کے درمیان سلام نہ پھیرا جائے گا ‘ بلکہ آخر میں پھیریں گے۔ البتہ عروہ نے جناب نبی اکرم (صلی اللہ علیہ وآلہ وسلم) سے نقل کیا آپ پانچ وتر پڑھتے اور ان کے آخر میں بیٹھتے ‘ ہمیں اس کی تاویل نہیں مل سکی۔ عام روایات جو خود عروہ یا اوروں نے حضرت عائشہ صدیقہ (رض) سے نقل کی ہیں وہ اس کے خلاف ہیں۔ پس کثیر روات کی روایت عروہ کی منفرد روایت سے اولیٰ ہے اور عبداللہ بن عباس (رض) نے جناب رسول اللہ (صلی اللہ علیہ وآلہ وسلم) کے کچھ روایات نقل کی ہیں جن کا مفہوم وہی ہے جو روایت ِ صدیقہ (رض) کا ہے۔ ان میں سے یہ روایات ہیں۔