١٨٣٧: سلیمان یشکری کہتے ہیں کہ میں نے حضرت جابر بن عبداللہ (رض) سے نماز خوف میں قصد کا سوال کیا کہ یہ حکم کب نازل ہوا اور کہاں نازل ہوا ؟ تو جابر (رض) نے فرمایا ہم شام سے آنے والے قریش کے قافلہ کا سامنا کرنے نکلے جب ہم مقام نخل میں پہنچے تو ایک آدمی ایک قبیلے سے جناب رسول اللہ (صلی اللہ علیہ وآلہ وسلم) کی خدمت میں آیا اور اس نے سوال کیا کیا تم محمد ہو ؟ آپ نے فرمایا ہاں ! اس نے کہا کیا تم مجھ سے نہیں ڈرتے ؟ آپ نے فرمایا نہیں۔ تو اس نے کہا تمہیں مجھ سے کون بچائے گا ؟ آپ نے فرمایا اللہ تعالیٰ مجھے تم سے بچائے گا۔ پھر اس نے تلوار سونت لی صحابہ کرام (رض) نے اس کو ڈانٹا اور دھمکایا پھر جناب رسول اللہ (صلی اللہ علیہ وآلہ وسلم) نے کوچ کا حکم فرمایا انھوں نے ہتھیار تھام لیے پھر اذان دی گئی پس جناب رسول اللہ (صلی اللہ علیہ وآلہ وسلم) ایک جماعت کو نماز پڑھائی اور ایک جماعت ان کی حفاظت کرتی رہی جو جماعت آپ کے قریب تھی ان کو دو رکعت پڑھائی سلام پھیرا (علامتی سلام) پھر یہ جماعت الٹے پاؤں پیچھے ہٹ گئی اور اپنے ساتھیوں کی جگہ جا کھڑے ہوئے اور دوسری جماعت آئی پس ان کو دو رکعت پڑھائی اور پہلی جماعت ان کی حفاظت کر رہی تھی پھر آپ نے سلام پھیرا (یہ سلام انقطاع صلوۃ والا تھا) پس اس طرح جناب نبی اکرم (صلی اللہ علیہ وآلہ وسلم) کی چار رکعت ہوگئیں اور ہر گروہ کی دو دو رکعت ہوئیں پس اسی دن اللہ تعالیٰ نے نماز قصر اتاری اور مسلمانوں کو اسلحہ سمیت نماز کا حکم دیا۔
تخریج : ابن حبان ٣ ج ٤ س ٢٣٧۔
اللغات : عیر۔ قافلہ۔ سل۔ سونتنا۔ تہردد۔ ڈرانا۔ اوعد۔ دھمکانا۔
حاصل روایات : اس روایت سے ثابت ہوتا ہے کہ جناب رسول اللہ (صلی اللہ علیہ وآلہ وسلم) نے ان کو چار رکعت پڑھائیں اور یہ نماز قصر کے نزول سے پہلے کی بات ہے پس اس وقت جناب رسول اللہ (صلی اللہ علیہ وآلہ وسلم) پر بھی چار لازم تھیں اور مقتدیوں پر بھی چار لازم تھیں اور سفر و حضر کی نماز یکساں تھی۔ پس لازم ہے کہ جب جابر اور ابو بکرہ (رض) میں یہی حکم ہو اور مقتدیوں نے دو دو بعد میں پوری کی ہوں جیسا کہ حضر میں اگر صلوۃ خوف ہو تو اس کے سب قائل ہیں۔
ایک اشکال :
اس روایت میں تو جناب رسول اللہ (صلی اللہ علیہ وآلہ وسلم) کا دو دو رکعت الگ پڑھانا ثابت ہو رہا ہے کیونکہ روایت میں (ثم سلم) کے الفاظ موجود ہیں۔
جواب : یہ سلام قطع صلوۃ والا نہ تھا بلکہ طائفہ اولیٰ کو خبردار کرنے کے لیے تھا کہ اب ان کے لوٹنے کا وقت ہوگیا اور یہ اس زمانے کی بات ہے جبکہ نماز میں کلام ممنوع نہ تھا جیسا کہ حضرت عبداللہ بن مسعود (رض) کی روایت میں مذکور ہے اور ہم عنقریب ابو سعید الخدری ‘ زید بن ارقم (رض) سے بھی باب صلوۃ الوسطیٰ میں گزری اور آئندہ باب العلوم فی الصلاۃ تحت روایۃ ذوالندین آئے گی۔ اس میں ہم ذکر کریں گے۔
جواب روایت جابر (رض) عن طریق آخر : ہم روایت پیش کرتے ہیں کہ حضرت جابر (رض) فرماتے ہیں آپ نے ایک ایک رکعت پڑھائی ملاحظہ ہو۔