١٨٣٨: شرحبیل بن سعد ابو سعد نے حضرت جابر بن عبداللہ (رض) سے انھوں نے رسول اللہ (صلی اللہ علیہ وآلہ وسلم) سے نماز خوف کے سلسلہ میں نقل کیا ہے کہ جناب رسول اللہ (صلی اللہ علیہ وآلہ وسلم) اور ایک جماعت آپ کے پیچھے کھڑے ہوئے اور ایک گروہ اس گروہ کے پیچھے بیٹھا ہوا تھا جو آپ کے پیچھے تھا مگر ان کے چہرے آپ کی طرف تھے پس جناب رسول اللہ (صلی اللہ علیہ وآلہ وسلم) نے تکبیر کہی اور دونوں گروہوں نے تکبیر کہی آپ نے رکوع کیا اور اس جماعت کے بھی رکوع کیا جو آپ کے پیچھے تھی اور دوسری جماعت نے آپ کے پیچھے بیٹھے تھے پھر آپ نے سجدہ کیا اور انھوں نے بھی سجدہ کیا اور دوسرے بیٹھے رہے پھر آپ نے قیام کیا اور انھوں نے بھی قیام کیا اور پیچھے کی طرف ہٹ گئے اور بیٹھنے والوں کی جگہ پہنچ گئے دوسرا گروہ آیا اور ان کو جناب رسول اللہ (صلی اللہ علیہ وآلہ وسلم) نے دو سجدوں سمیت مکمل رکعت پڑھائی اور دوسرے بیٹھے تھے پھر آپ نے سلام پھیرا پھر دونوں جماعتیں کھڑی ہوئیں اور اپنی ایک ایک رکعت دو سجدوں سمیت ادا کی۔ اس روایت سے یہ بات معلوم ہوتی ہے کہ جناب رسول اللہ (صلی اللہ علیہ وآلہ وسلم) نے ان کو نماز قصر کے نزول سے پہلے ان کو چار رکعت نماز پڑھائی۔ قصر کا حکم اس کے بعد نازل ہوا۔ پس اس وقت آپ (صلی اللہ علیہ وآلہ وسلم) پر چار رکعت ہی فرض تھیں اور آپ کے مقتدیوں کی فرض نماز بھی اسی طرح تھی۔ اس لیے کہ اس وقت تک ان کے حق میں سفر و حضر کا حکم برابر تھا۔ جب ایسی صورت تھی تو دونوں گروہوں نے دو دو رکعات پوری کیں۔ جیسا کہ اگر مقیم ہوتے تو دو دو رکعت کو پورا کرنا لازم آتا۔ اگر کوئی شخص یہ اعتراض کرے کہ یہ حدیث دلالت کر رہی ہے کہ دو رکعت ادا کرنے کے بعد آپ نماز سے باہر ہے ‘ کیونکہ حدیث پہلے گروہ کے ساتھ دو رکعت پر سلام پھیرنا مذکور ہے۔ اس کے جواب میں ہم عرض کریں گے کہ یہ مذکورہ سلام تشہد والا ہو جس سے نماز سے نکلنے کا ارادہ نہیں ہوتا اور یہ بھی احتمال ہے کہ اس سلام سے اس جماعت کو نماز سے لوٹنے کا مقام بتانا ہو اور اس زمانے میں گفتگو جائز تھی اس سے نماز قطع نہ ہوتی تھی۔ جیسا کہ حضرت ابن مسعود ‘ ابوسعید خدری اور زید بن ارقم (رض) سے مروی ہے۔ ہم نے کسی دوسرے موقع پر اس کتاب میں ان روایات کو ذکر کیا ہے جہاں حدیث ذوالیدین (رض) کی وجوہ ذکر کی گئی ہیں۔ حضرت جابر (رض) نے نماز خوف کو جناب رسول اللہ (صلی اللہ علیہ وآلہ وسلم) سے اس طریقہ کے علاوہ طریق سے بھی نقل کیا ہے۔ ملاحظہ ہو۔
تخریج : المستدرک ١؍٤٨٦‘ ١٢٤٦۔
تنقید بروایت جابر (رض) :
اس روایت میں یہ ہے کہ وہ نماز میں بیٹھنے کی حالت میں داخل ہوئے تمام مسلمانوں کا اس پر اتفاق ہے کہ جس آدمی نے بالعذر بیٹھ کر نماز شروع کی پھر وہ کھڑا ہوگیا اور نماز کو مکمل کیا تو اس کی نماز باطل ہے کیونکہ اس نے بلاعذر قیام کو ترک کیا اس کا نماز میں داخلہ ہی درست نہیں کہ جس پر رکوع و سجود کا دارومدار ہے پس یہ بات ناممکن ہے آپ کے پیچھے دوسری صرف میں بیٹھ کر وہ نماز میں داخل ہوئے پس جب یہ روایت قابل استدلال نہ ہوئی تو جابر (رض) کی وہ روایت جو دوسری روایات کے مطابق ہے وہی محل استدلال رہی۔
فریق خامس کا مؤقف اور مستدل :
یہ ابن ابی لیلیٰ اور مجاہد (رح) کا مؤقف ہے امام کے ساتھ دونوں فریق اسلحہ سمیت صف بستہ ہوں جب امام سجدہ کرے تو صف اول سجدہ کرے پھر دونوں سجدوں سے جب فارغ ہوں تو دوسرا گروہ سجدہ کرے پھر تو یہ گروہ پیچھے ہٹ جائے اور دوسرا گروہ ان کی جگہ آئے اور امام جب سجدہ کرے تو یہ اس کے ساتھ سجدے کریں جب یہ سجدہ کر چکیں تو دوسرا گروہ ان کے بعد خود سجدہ کرے اور سلام دونوں امام کے ساتھ پھیریں۔