١٨٤٥: شریک بن عبداللہ بن ابی نمر نے حضرت انس (رض) سے سنا کہ ایک آدمی جمعہ کے دن مسجد میں اس دروازے سے داخل ہوا جو منبر کے سامنے والی جانب ہے اس وقت جناب رسول اللہ (صلی اللہ علیہ وآلہ وسلم) کھڑے خطبہ دے رہے تھے وہ سیدھا جناب رسول اللہ (صلی اللہ علیہ وآلہ وسلم) کے سامنے جا کھڑا ہوا اور عرض کرنے لگا یارسول اللہ (صلی اللہ علیہ وآلہ وسلم) مال تباہ ہوگئے اور منقطع ہوگئے یعنی جانور بھوک کی وجہ سے سواری کے قابل نہ رہے پس آپ اللہ تعالیٰ سے دعا فرمائیں کہ وہ ہمیں بارش عنایت فرمائے پس جناب رسول اللہ (صلی اللہ علیہ وآلہ وسلم) نے اسی وقت ہاتھ اٹھائے اور یہ دعا کی اے اللہ ہمیں رحمت سے سیراب فرما حضرت انس (رض) کہتے ہیں اللہ کی قسم ! آسمان میں اس وقت کوئی بادل نہ تھا نہ چھوٹا نہ بڑا اور نہ ہی ہمارے اور جبل سلع کے درمیان کوئی گھر یا عمارت حائل تھی انس (رض) کہتے ہیں سلع کے پچھلی جانب ڈھال جیسا بادل رونما ہوا جب وہ آسمان کے درمیان میں پہنچا تو پھیل گیا پھر بارش شروع ہوئی انس (رض) کہتے ہیں ایک ہفتہ ہم نے سورج نہیں دیکھا۔ حضرت انس (رض) کہتے ہیں پھر اسی دروازے سے ایک آدمی آئندہ جمعہ کے دن داخل ہوا جبکہ رسول اللہ (صلی اللہ علیہ وآلہ وسلم) لوگوں کو خطبہ دے رہے تھے اور سیدھا آپ کے سامنے کھڑا ہوگیا پھر کہنے لگا یارسول اللہ (صلی اللہ علیہ وآلہ وسلم) ! مال تباہ ہوگئے اور راستے (پانی کی کثرت) سے رک گئے پس آپ اللہ تعالیٰ سے دعا فرمائیں کہ وہ اس بارش کو روک دے پس جناب رسول اللہ (صلی اللہ علیہ وآلہ وسلم) نے اپنے دست مبارک اٹھائے اور یہ دعا فرمائی اے اللہ ! ہمارے اطراف و جوانب اور ٹیلوں اور پہاڑوں پر برسا نہ کہ ہم پر۔ حضرت انس (رض) کہتے ہیں بس بارش رک گئی اور آپ (صلی اللہ علیہ وآلہ وسلم) مسجد سے نکل کر دھوپ میں چلنے لگے۔
اللغات : وجاہ۔ سامنے۔ یغیثنا۔ بارش کر دے۔ قزعۃ۔ بادل کا ٹکڑا۔ حوالینا۔ یہ حول کی جمع ارد گرد اکام۔ اکمۃ کی جمع ٹیلہ۔ ظراب۔ ظرب کی جمع ہے پھیلا ہوا پہاڑ۔
تخریج : بخاری فی الاستسقاء باب ٦‘ ٧‘ ٩‘ مسلم فی الاستسقاء نمبر ٨‘ نسائی فی الاستسقاء باب ١٠۔
خلاصہ الزام : بارش کے لیے دعا مانگنے کو استسقاء کہتے ہیں۔ اس میں اختلاف ہے کہ دعا ہے یا اس میں مسنون نماز بھی ہے پھر اس نماز میں ایک خطبہ یا دو اور تحویل رداء مسنون ہے یا جائز ‘ امام و مقتدی ہر دو یا صرف امام کرے۔
مؤقف ِاوّل : استسقاء میں مستقل نماز نہیں کبھی فقط دعا کی گئی کبھی نماز پڑھی گئی اور امام کے لیے تحویل رداء جائز ہے مسنون نہیں دلیل یہ ہے۔