١٨٦٠: ہشام بن عروہ نے اپنے والد سے انھوں نے حضرت عائشہ (رض) سے نقل کیا کہ لوگوں نے جناب رسول اللہ (صلی اللہ علیہ وآلہ وسلم) کی خدمت میں بارش کے نہ ہونے کی شکایت کی آپ (صلی اللہ علیہ وآلہ وسلم) نے منبر منگوایا جو کہ عیدگاہ میں رکھ دیا گیا پھر لوگوں سے مقررہ دن میں جمع ہونے کا حکم فرمایا۔ حضرت عائشہ (رض) کہتی ہیں کہ جناب رسول اللہ (صلی اللہ علیہ وآلہ وسلم) اس وقت نکلے جب کہ سورج کا کنارہ نکل آیا پس آپ منبر پر تشریف فرما ہوئے اور اللہ تعالیٰ کی حمدوثنا کی پھر فرمایا تم نے قحط کا شکوہ کیا اور اپنے علاقہ میں خشک سالی کا ذکر کیا بارش وقت سے مؤخر ہوئی اللہ تعالیٰ نے تمہیں حکم دیا ہے کہ تم دعا کرو اس نے وعدہ فرمایا ہے کہ وہ قبولیت عنایت فرمائیں گے پھر اس طرح دعا فرمائی تمام تعریفیں اللہ تعالیٰ کے لیے ہیں جو کہ جزاء کے دن کا مالک ہے اس کے سوا کوئی معبود نہیں وہ جو چاہتا ہے کرتا ہے اے اللہ ! تو اللہ ہے تیرے سوا کوئی معبود نہیں تو غنی ہے اور ہم محتاج ہیں ہم پر بارش نازل فرمایا اور اس بارش کو ہماری قوت اور مقررہ وقت تک پہنچانے کا ذریعہ بنا دے۔ پھر آپ نے دعا کے لیے ہاتھ بلند فرماتے اس قدر بلند فرماتے کہ بغلوں کی سپیدی ظاہر ہونے لگی پھر آپ نے اپنی پشت کو لوگوں کی طرف موڑ لیا اور قلب رداء فرمائی اس حال میں کہ آپ اپنے ہاتھوں کو بلند کرنے والے تھے۔ پھر لوگوں کی طرف رخ فرمایا اور منبر سے نیچے تشریف لائے پھر دو رکعت نماز ادا فرمائی اور اللہ تعالیٰ کی تقدیس کے کلمات شروع کئے پھر تو بادل گرجنے لگا بجلی چمکنے لگی اور اللہ تعالیٰ کے حکم سے بارش ہونے لگی آپ واپس مسجد میں تشریف نہ لائے تھے کہ وادیاں بہہ پڑیں جب آپ نے دیکھا کہ لوگ کپڑوں کو سمیٹے جلد کوٹھڑیوں میں اور پناہ گاہوں میں گھس رہے ہیں تو یہ دیکھ کر آپ خوب ہنسے یہاں تک کہ آپ کے نواجز ظاہر ہوگئے اور زبان سے فرمایا اشہد ان اللہ علی کل شئی قدیر وانی عبداللہ ورسولہ۔
تخریج : ابو داؤد فی الاستسقاء باب ٢‘ نمبر ١١٧٣۔
اللغات : جدب۔ قحط ‘ خشک سالی ‘ جنابہ۔ جانب و طرف۔ استئخار۔ مؤخر ہونا۔