١٩١٧: نافع نے حضرت ابن عمر (رض) سے انھوں نے جناب نبی کریم (صلی اللہ علیہ وآلہ وسلم) سے اسی طرح سے روایت کی ہے۔ امام طحاوی (رح) فرماتے ہیں کہ ایک جماعت علماء کا یہی خیال ہے کہ دن اور رات کی نمازیں دو دو رکعت ہیں اور ہر دو رکعت کے بعد سلام پھیرے ‘ مگر دیگر حضرات نے اس سلسلہ میں ان سے اختلاف کرتے ہوئے کہا کہ دن کی نماز اگر پسند کرو تو دو رکعات پڑھو اور دو کے بعد سلام پھیرو اور چاہو تو چار پڑھو ‘ مگر اس سے زائد کو وہ مکروہ خیال کرتے ہیں۔ البتہ رات کی نماز کے سلسلہ میں ان میں اختلاف ہے۔ ایک جماعت کا قول یہ ہے کہ اگر تم چاہو تو ایک تکبیر سے دو رکعت اور اگر چاہو تو چار رکعت اور اگر چاہو تو چھ رکعت اور اگر چاہو تو آٹھ رکعت ادا کرسکتے ہو اس سے زیادہ ایک نیت سے مکروہ ہیں اور یہ امام ابوحنیفہ (رح) کا قول ہے۔ دوسروں نے کہا کہ رات کی نماز دو دو کر کے ادا کی جائے گی اور ہر دو رکعت کے بعد سلام پھیرا جائے گا۔ یہ امام ابویوسف (رح) کا قول ہے۔ باقی دن کی نماز کے سلسلہ میں ہم نے جو بیان کیا وہ امام ابوحنیفہ ‘ ابو یوسف اور محمد (رح) کا قول ہے۔ پہلے قول کو جن حضرات نے اختیار کیا ہے ان کے خلاف دلیل یہ ہے کہ جن حضرات سے ابن عمر (رض) کی روایت سوائے علی البارقی (رح) کے کی ہے ‘ انھوں نے اس سے صرف رات کی نماز مراد لی ہے نہ کہ دن کی اور ہم نے اس کا تذکرہ باب الوتر میں کردیا اور جناب رسول اللہ (صلی اللہ علیہ وآلہ وسلم) کے بعد ابن عمر (رض) کا عمل ان روایات کے فساد پر دلالت کرتا ہے جن روایات کو اس باب کے شروع میں ہم نقل کر آئے۔
حاصل روایات : رات و دن کی نفلی نماز دو دو رکعت مشروع ہے نہ کہ زائد جیسا کہ ان روایات سے ظاہر ہے۔
فریق ثانی : دن میں تو دو یا چار ایک تحریمہ سے اور رات کو دو ‘ چار ‘ چھ ‘ آٹھ تک پڑھ سکتے ہیں اس سے زائد مکروہ ہیں یہ امام صاحب کا قول ہے البتہ ابو یوسف کے ہاں ہر دو رکعت پر سلام کرنا ضروری ہے۔
سابقہ روایت کا جواب نمبرا : اس روایت کو ابن عمر (رض) سے علی البارقی اور العمری نے نقل کیا اور صلوۃ اللیل کے بعد والنہار کے الفاظ یہ زائد ہیں جو حفاظ حدیث نے نقل نہیں کئے حفاظ کی روایات باب الوتر طحاوی میں موجود ہیں امام نسائی نے اس اضافے کو خطا قرار دیا ہے۔
نمبر 2: ابن عمر (رض) نے اپنا عمل جناب رسول اللہ (صلی اللہ علیہ وآلہ وسلم) کے بعد اس کے خلاف نقل کیا۔ روایات ملاحظہ ہوں۔