١٩٣٦: خرشد بن حر کہتے ہیں کہ عمر (رض) نماز جمعہ کے بعد انہی جیسی (دو رکعت) نماز پڑھنے کو ناپسند کرتے تھے۔ امام طحاوی (رح) فرماتے ہیں اسی وجہ سے امام ابویوسف نے چار رکعات کو دو رکعت سے پہلے پڑھنا پسند فرمایا کیونکہ وہ دو کی مثل نہیں۔ پس دو رکعات کو مقدم کرنا مکروہ ہے اس لیے کہ وہ جمعہ کی مثل ہیں۔ البتہ امام ابوحنیفہ (رح) کا مسلک وہی ہے جو شروع باب میں مذکور ہوا۔
تخریج : مصنف ابن ابی شیبہ فی الصلاۃ ٢؍٢٠٦۔
امام طحاوی (رح) فرماتے ہیں : اسی وجہ سے امام ابو یوسف (رح) چار کو مقدم اور دو کو مؤخر کرنے کے قائل ہیں تاکہ مماثلت نہ رہے امام صاحب کا قول تو ہم پہلے ذکر کر آئے۔
نوٹ ۔۔۔ مسئلہ : جمعہ سے قبل چار رکعات کے متعلق جو مرفوع روایات ابن ماجہ وغیرہ میں ہیں ان میں سقم امام صاحب کے زمانہ کے بعد والے روات کی طرف سے ہے امام صاحب سے اوپر تک کی سند میں کوئی سقم نہیں ہے پس وہ چار سنت ثابت ہوجائیں گی۔ (مقدمہ اوجز)
دو اور چار نوافل کی الگ روایات ملتی ہیں اور چھ رکعات فعل صحابہ کرام (رح) سے ثابت ہوئی اسی وجہ سے ائمہ میں اختلاف ہوا امام طحاوی (رح) نے چھ والے قول کو راجح قرار دے کر وضاحت کردی اور اپنی رائے بھی ان کی یہی معلوم ہوئی۔ آخر میں امام صاحب کے نام کا حوالہ دے کر معذرت کا طرز اختیار کیا۔ واللہ اعلم۔