٢١٥٦: ابو ذئب نے شعبہ سے نقل کیا کہ حضرت ابن عباس (رض) کہا کرتے تھے اے لوگو ! کیا تم اللہ تعالیٰ سے نہیں ڈرتے۔ اپنے فرائض اور سنن میں فاصلہ کرو شعبہ کہتے ہیں کہ ابن عباس (رض) مغرب کے بعد کی دو رکعت ہمیشہ گھر میں پڑھتے۔ امام طحاوی (رح) فرماتے ہیں ہمارے ہاں بھی فرائض و نوافل کے مابین فاصلہ مستحب ہے۔ جیسا کہ ان روایات باب میں جناب رسول اللہ (صلی اللہ علیہ وآلہ وسلم) کا ارشاد معلوم ہو رہا ہے۔ ہم اس میں ایسے آدمی کے لیے کچھ حرج خیال نہیں کرتے جس نے گھر میں فجر کی دو رکعت ادا نہیں کیں اور وہ مسجد میں ایسے حال میں پہنچا کہ امام نماز میں داخل ہوچکا تھا کہ وہ دو رکعت سنت فجر مسجد کے پچھلے حصہ میں پڑھ لے پھر وہاں سے چل کر مسجد کے اگلے حصہ میں آئے اور لوگوں کے ساتھ نماز میں شمولیت اختیار کرلے۔ کیا تم نہیں دیکھتے کہ اگر یہ شخص نماز ظہر و عصر یا عشاء میں ہوتا تو اسے کچھ حرج نہ تھا اور ایسا کرنے والا فرض و نفل کو ملانے والا نہ بنتا تھا۔ پس اسی طرح وہ جب نماز صبح کے وقت میں آئے تو سنت کے ادا کرنے میں کچھ حرج نہیں۔ ایسا کرنے والا بھی فرض و نفل کو ملانے والا نہ بنے گا۔ یہ امام ابوحنیفہ ‘ ابویوسف اور محمد (رح) کا قول ہے اور متقدمین کی ایک بڑی جماعت سے ایسا مروی ہے ‘ جو درج ذیل ہے۔
ابن عباس (رض) نے اپنے طرز عمل سے فرائض و نوافل میں فرق و فاصلہ ظاہر کیا اور یہی فاصلہ روایت ابوہریرہ ‘ ابن بحینہ ‘ ابن سرجس (رض) کی روایات میں مراد ہے۔ واللہ اعلم۔
فریق ثانی کا مؤقف اور دلائل :
نماز صبح کی جماعت کھڑی ہوجائے اور جس شخص نے سنت ادا نہیں کی وہ مسجد کے ایک کنارے پر سنت ادا کر کے مسجد والوں کے ساتھ نماز میں شریک ہو تو کوئی حرج نہیں ہے۔
دلیل نمبر 1: اگر ظہر ‘ عصر یا عشاء کی نماز ہو اور کوئی آدمی سنت پڑھ کر یا دو رکعت پڑھ کر جماعت میں شامل ہو تو کوئی ممانعت نہیں ہے اور ایسا کرنے والے کو کوئی فرض و نفل کا ملانے والا شمار نہیں کرتا بالکل فجر میں بھی یہی حکم ہے اور وہ بھی واصل نہ بنے بشرطیکہ فاصل ہو۔
یہی ہمارے ائمہ امام ابوحنیفہ ‘ ابو یوسف ‘ محمد (رح) کا قول ہے۔