٢٢٤٩: ابوالشعثاء نے ابن عمر (رض) سے نقل کیا کہ میں نے آپ کو بیت اللہ میں داخل ہوتے دیکھا یہاں تک کہ جب آپ دو ستونوں کے درمیان پہنچ گئے تو آپ آگے چلتے رہے یہاں تک کہ بیت اللہ شریف کی دیوار سے چمٹ گئے پھر آپ نے کھڑے ہو کر نماز ادا فرمائی پھر میں آیا اور آپ کے پہلو میں کھڑا ہوگیا پس آپ نے چار رکعت نماز ادا کی میں نے کہا مجھے یہ بتلاؤ کہ جناب رسول اللہ (صلی اللہ علیہ وآلہ وسلم) نے بیت اللہ شریف کی کون سی جگہ نماز ادا فرمائی ؟ تو کہنے لگے اس جگہ کے متعلق اسامہ نے بتلایا کہ آپ نے نماز ادا فرمائی۔ یہ اسامہ بن زید (رض) ہیں کہ جن سے ابن عمر (رض) نقل کر رہے ہیں کہ میں نے جناب رسول اللہ (صلی اللہ علیہ وآلہ وسلم) کو بیت اللہ میں نماز ادا کرتے دیکھا۔ اس سلسلہ میں انھوں نے اور ابن عباس (رض) نے اسامہ سے روایت میں اختلاف کیا اور ابن عمر (رض) نے بلال (رض) سے بھی اسی طرح کی روایت کی ہے جیسی اسامہ (رض) سے۔ پس جب حضرت اسامہ (رض) کی روایات متضاد اور مرتفع ہونے اور ثابت ہونے میں برابر ہوگئیں تو بلال (رض) والی روایت ثابت ہوگئی کیونکہ ان سے روایت اس کے مخالف مروی نہیں اور ابن عمر (رض) کی روایت مطلق ہے کہ جناب رسول اللہ (صلی اللہ علیہ وآلہ وسلم) نے کعبہ میں نماز ادا فرمائی۔
تخریج : مسلم فی الحج روایت نمبر ٣٩٢‘ مسند احمد ٥؍٢٠٤۔

حاصل روایات : یہ اسامہ بن زید انہی سے حضرت ابن عمر (رض) نے نقل کیا کہ میں جناب نبی اکرم (صلی اللہ علیہ وآلہ وسلم) کو بیت اللہ میں نماز پڑھتے پایا جناب ابن عباس (رض) نے بھی اسامہ سے روایت کی مگر اس میں نماز کا انکار کیا گیا ہے اب اسامہ (رض) کی روایت میں تضاد کی وجہ سے تساقط ہوگا تو بلال (رض) کی روایت تو اس موضوع پر کافی روایت ہے اس کے متضاد کوئی روایت نہیں پس نماز پڑھنا ثابت ہوجائے گا۔
ابن عمر (رض) کی مطلق روایات :
ابن عمر (رض) سے مطلقاً بھی روایات وارد ہیں جن میں جناب رسول اللہ (صلی اللہ علیہ وآلہ وسلم) کا بیت اللہ میں نماز پڑھنا ثابت ہوتا ہے۔ ملاحظہ ہو۔