٢٢٨٩: یحییٰ بن کثیر نے ابو سلمہ سے انھوں نے حضرت ابوہریرہ (رض) سے نقل کیا کہ جناب رسول اللہ (صلی اللہ علیہ وآلہ وسلم) نے فرمایا جس نے نماز عصر کی ایک رکعت ایسے وقت پا لی کہ سورج غروب نہ ہوا تھا تو گویا اس کی نماز مکمل ہوگئی اور جب نماز صبح کی ایک رکعت پا لی تو گویا اس کی نماز مکمل ہوگئی۔ ان مذکورہ روایات میں اس نماز پر بناء کا تذکرہ ہے جس میں وہ طلوع آفتاب سے پہلے داخل ہوا۔ اس بات کو اختیار کرنے والوں کے خلاف دلیل یہ ہے کہ ممکن ہے جناب نبی اکرم (صلی اللہ علیہ وآلہ وسلم) کا یہ فعل طلوع آفتاب کے وقت نماز میں داخلے کی ممانعت سے پہلے ہو پھر آپ نے اس کی ممانعت فرمائی اور ممانعت کے سلسلہ میں کثیر تعداد میں روایات وارد ہیں ‘ ہم ان آثار کو باب مواقیت الصلاۃ میں نقل کر آئے۔ دوسرا احتمال یہ ہے کہ جس میں پہلے اباحت تھی وہ ممانعت کے بعد منسوخ ہوگیا۔ پہلے قول والے کہتے ہیں کہ نوافل کی ممانعت خاص ہے قضاء فرائض کی ممانعت نہیں۔ ذرا غور کرو کہ جناب نبی اکرم (صلی اللہ علیہ وآلہ وسلم) نے صبح کی نماز کے بعد طلوع آفتاب تک اور عصر کے بعد غروب تک نماز کی ممانعت فرمائی ہے اور یہ ہمارے اور تمہارے ہاں فوت شدہ نماز کی قضاء سے ان دونوں اوقات میں ممانعت نہیں۔ پس اسی طرح طلوع آفتاب کے وقت تم نے نماز سے ممانعت کی روایت نقل کی ہے وہ بھی ہمارے ہاں قضاء فائتہ سے مانع نہیں بلکہ وہ نفلی نماز سے صرف مانع ہے۔ دوسرے قول کے قائلین پہلے قول والوں کے مخالف دلیل لاتے ہیں اس میں یہ بھی مذکور ہے کہ جناب رسول اللہ (صلی اللہ علیہ وآلہ وسلم) سے ایسی روایات وارد ہیں جو اس بات پر دلالت کرتی ہیں کہ طلوع و غروب آفتاب کے اوقات کی ممانعت میں فوت شدہ فرض نمازیں بھی شامل ہیں۔ روایات ذیل میں ہیں۔
: بخاری ١؍٧٩‘ من ادرک رکعۃ۔
جواب : طلوع آفتاب سے پہلے والی نماز پر بناء کی جو روایات نقل کی گئی ہیں یہ نسخ سے پہلے کی ہیں آپ نے طلوع و غروب و نصف النہار کے وقت نماز سے روک دیا اس لیے ان سے استدلال درست نہیں۔ پس یہ بھی احتمال ہے کہ یہ ان سے ہو جس میں اباحت ہے مگر نہی کے ذریعہ وہ بھی منسوخ ہے۔
ضمنی اشکال :
ممانعت والی روایات سے مراد صرف نوافل کی ممانعت ہے نہ کہ فرائض کی جیسا کہ نماز فجر اور عصر کے بعد نوافل کی ممانعت ہے فرائض کی ہرگز نہیں۔
جواب : طلوع و غروب اور نصف النہار کے وقت جناب رسول اللہ (صلی اللہ علیہ وآلہ وسلم) نے ہر قسم کی نماز سے منع فرمایا جس میں فوت شدہ نمازیں بھی شامل و داخل ہیں۔ روایت ملاحظہ ہو۔