٢٣١٧: ابو بردہ بن ابو موسیٰ نے اپنے والد ابو موسیٰ (رض) سے نقل کیا کہ جناب رسول اللہ (صلی اللہ علیہ وآلہ وسلم) بیمار ہوئے تو آپ نے فرمایا ابوبکر (رض) کو کہو کہ وہ لوگوں کو نماز پڑھائیں۔ حضرت عائشہ (رض) کہتی ہیں کہ (میں نے کہا) ابوبکر نرم دل آدمی ہیں اس پر بھی آپ نے فرمایا جاؤ لوگوں کو کہو کہ وہ ابوبکر کو نماز پڑھانے کے لیے کہیں تم تو یوسف کو مشورہ دینے والیاں ہو۔ ابو موسیٰ کہتے ہیں کہ ابوبکر (رض) آپ کی زندگی میں (آپ کے مصلیٰ پر امامت کے لئے) کھڑے ہوئے۔ ان کے خلاف دلیل یہ ہے اگرچہ یہ روایت جس کا انھوں نے تذکرہ کیا وہ مروی ہے مگر نماز میں جناب رسول اللہ (صلی اللہ علیہ وآلہ وسلم) کے افعال اس بات پر دلالت کرتے ہیں کہ آپ امام تھے (نہ کہ مقتدی) اور وہ اس طرح کہ حضرت عائشہ صدیقہ (رض) نے اسود والی روایت میں فرمایا (فعقد رسول اللّٰہ (صلی اللہ علیہ وآلہ وسلم) عن یسار ابی بکر) کہ آپ ابوبکر (رض) کے بائیں جانب بیٹھ گئے اور یہ امام کے بیٹھنے کا مقام ہے۔ اگر جناب ابوبکر (رض) امام ہوتے تو جناب نبی اکرم (صلی اللہ علیہ وآلہ وسلم) ان کے دائیں جانب بیٹھتے اب جبکہ وہ آپ (صلی اللہ علیہ وآلہ وسلم) ان کے بائیں جانب بیٹھے اور ابوبکر (رض) آپ کی دائیں جانب تھے۔ تو یہ اس بات کی کھلی دلیل ہے کہ آپ امام تھے اور حضرت ابوبکر (رض) مقتدی تھے۔ دوسری بات یہ ہے کہ ابن عباس (رض) نے اپنی روایت میں یہ بات ذکر کی ہے کہ جناب رسول اللہ (صلی اللہ علیہ وآلہ وسلم) نے قراءت کو وہیں سے شروع فرمایا جہاں تک ابوبکر (رض) پہنچے تھے۔ اس سے یہ دلالت میسر آئی کہ ابوبکر (رض) نے قراءت کو روک دیا اور جناب نبی اکرم (صلی اللہ علیہ وآلہ وسلم) نے قراءت شروع فرمائی۔ اس سے ثابت ہوگیا کہ آپ امام تھے۔ اگر یہ بات نہ ہوتی تو آپ قراءت نہ کرتے کیونکہ وہ ایسی نماز تھی جس میں قراءت کو جہر سے پڑھا جاتا ہے۔ اگر یہ بات نہ ہوتی تو آپ مقام قراءت کو نہ جان سکتے کہ کہاں ابوبکر (رض) نے قراءت کو چھوڑا ہے اور دوسرے مقتدیوں کو بھی معلوم نہ ہوسکتا۔ ہماری اس وضاحت سے یہ بات ثابت ہوگئی کہ یہ ایسی نماز تھی جس میں بلند آواز سے قراءت کی جاتی ہے اور جناب رسول اللہ (صلی اللہ علیہ وآلہ وسلم) نے اس میں قراءت فرمائی اور اس میں کسی کو بھی اختلاف نہیں ہے کہ مقتدی کو امام کے پیچھے قراءت نہ کرنا چاہیے جیسا امام قراءت کرتا ہو۔ اس سے یہ بات ثابت ہوگئی کہ جناب رسول اللہ (صلی اللہ علیہ وآلہ وسلم) اس نماز میں امام تھے یہ تو اس باب کے آثار کو پیش نظر رکھتے ہوئے صورت ہے۔ باقی نظر و فکر کا طریق پیش کیے دیتے ہیں۔ غور کرنے سے معلوم ہوتا ہے کہ وہ بنیادی بات جس پر سب کا اتفاق ہے کہ جب مقتدی امام کے ساتھ نماز میں شمولیت اختیار کرلے تو اس پر امام والے فرض کو لازم کردیتی ہے جو کہ پہلے اس پر فرض نہ تھے اور ہم یہ مقتدی کے متعلق خیال نہیں کرتے کہ اس پر جو چیز پہلے سے فرض تھی تو یہ داخل ہونا اس کے فرض کو ساقط کر دے گا۔ پس اس کی مثال یہ ہے کہ اگر کوئی مسافر کسی مقیم کے ساتھ نماز میں شامل ہوجائے تو اس کے ذمہ ضروری ہے کہ وہ مقیم والی نماز چار رکعت ادا کرلے حالانکہ اس مقیم امام کی اقتداء سے پہلے اس پر فرض نہ تھی (صرف دو رکعت تھیں) امام کے ساتھ شمولیت نے اس پر لازم کردی اور ہم نے دیکھا کہ اگر کوئی مقیم کسی مسافر کی اقتداء میں نماز ادا کرنے لگے تو وہ اس کی اقتداء میں نماز پڑھتا رہے گا جب امام اپنی نماز کو مکمل کرلے تو یہ مقیم والی نماز کی تکمیل کرے گا۔ پس مسافر امام کی اقتداء نے اس کے چار فرض کو گرا کر دو نہیں کردیا بلکہ وہ فرض اسی طرح رہیں گے اس میں ذرہ بھر حصہ ساقط نہ ہوگا۔ پس اس نظر کا تقاضا یہ ہے۔ وہ صحت مند آدمی جس پر قیام تھا جب وہ مریض کے ساتھ نماز میں شامل ہوا کہ جس مریض کا قیام والا فرض ساقط ہوچکا تو اس کی نماز میں داخلہ اس فرض کو اس سے ساقط نہ کرے گا جو داخلہ سے پہلے اس پر لازم تھا۔ اگر کوئی معترض یہ کہے کہ ہم دیکھتے ہیں کہ وہ غلام جس پر جمعہ لازم ہی نہیں اگر وہ جمعہ میں شامل ہوجائے تو وہ اس کی ظہر کی جگہ کفایت کر جائے گا اور ظہر کا فریضہ اس سے ساقط ہوجائے گا اور اس کے ذمہ سے وہ فرض ساقط ہوجائے گا جو امام کے ساتھ نماز میں داخلے سے پہلے اس پر لازم تھا۔ اس کے جواب میں کہا جائے گا کہ آپ کی یہ بات تو ہمارے قول کی مؤید ہے اور وہ اس طرح کہ غلام پر تو امام کے ساتھ داخلے سے پہلے جمعہ لازم ہی نہ تھا پھر جب وہ امام کے ساتھ نماز میں شامل ہوا تو اس کا نماز میں داخلہ ہی اس پر امام والی بات کو اس پر لازم کررہا ہے۔ پس وہ اس طرح اس مسافر کے حکم میں ہوگیا کہ جس پر جمعہ فرض نہ تھا مگر وہ امام کے ساتھ جمعہ میں شامل ہوگیا تو اب اس پر وہ چیز واجب ہوگئی جو اس کے امام پر واجب تھی اور اس کا وہ جمعہ ظہر کی بجائے کفایت کر جائے گا کیونکہ وہ ظہر کا بدل بن گیا۔ پس اسی طرح جب غلام پر امام کی نماز میں داخلہ کے بعد جمعہ لازم ہوگیا اور وہ ظہر کی جگہ کفایت کر گیا۔ کیونکہ وہ ظہر کا بدل بن گیا۔ پس ہماری اس بات سے یہ ثابت ہوگیا کہ اگر کوئی شخص دوسرے کے ساتھ نماز میں شامل ہوگا تو اس کی دو حالتیں ہوں گی بعض اوقات اس سے اس پر وہ چیز واجب ہوجائے گی جو داخلہ سے پہلے اس پر لازم نہ تھی اور جو داخلہ سے پہلے اس کے ذمہ لازم ہوچکی تھی وہ اس کے ذمہ سے ساقط نہ ہوگی (بعض اوقات دوسری صورت ہوگی جو مذکور ہوئی) اس سے یہ بات تو ثابت ہوگئی کہ وہ صحت مند جس پر قیام کرنا نماز میں لازم ہے جب وہ اس مریض کے ساتھ نماز میں شامل ہو جس سے فرض قیام ساقط ہے تو امام کے ساتھ نماز میں شمولیت سے اس سے فرض قیام ساقط نہ ہوگا جو کہ پہلے اس پر لازم ہوچکا تھا اور امام ابوحنیفہ ‘ ابو یوسف (رح) کا قول یہی ہے۔ امام محمد (رح) کا قول یہ ہے کہ صحت مند شخص کو ایسے مریض کی اقتداء ہی درست نہیں جو بیٹھ کر نماز ادا کرنے کی طاقت رکھتا ہو۔ اگرچہ وہ رکوع و سجدہ سے نماز ادا کرتا ہو۔ ان کا رجحان اس طرف ہے کہ جناب رسول اللہ (صلی اللہ علیہ وآلہ وسلم) کا بیٹھ کر نماز پڑھنا جبکہ صحابہ کرام (رض) حالت قیام میں تھے ‘ یہ آپ کی خصوصیت ہے۔ اس لیے کہ اس میں آپ نے وہ عمل کیا جو آپ کے بعد کسی کو جائز نہیں مثلاً آپ نے قراءت اس جگہ سے شروع فرمائی جہاں تک جناب ابوبکر (رض) پہنچے تھے۔ اسی طرح دوسری بات یہ ہے کہ جناب صدیق اکبر (رض) ایک ہی نماز میں امامت سے نکل کر مقتدی بن گئے اور یہ بات اجماعی ہے کہ یہ عمل آپ کے سواء اور کسی کے لیے جائز نہیں۔ پس اس سے یہ دلالت میسر آگئی کہ یہ عمل جناب رسالت مآب (صلی اللہ علیہ وآلہ وسلم) کے ساتھ مخصوص ہے جو دوسروں کے لیے ممنوع ہے۔
: مسلم فی الصلاۃ نمبر ١٠١۔
حاصل روایات : ان روایات ثلاثہ سے تو امامت ابوبکر (رض) معلوم ہوتی ہے اور اس میں تو کسی کو اشکال نہیں وہ بھی کھڑے تھے اور مقتدی بھی کھڑے تھے پس سابقہ روایات سے استدلال باطل ہے۔
جواب : یہ دونوں روایات بلاشبہ موجود ہیں۔
نمبر 1: مگر جن روایات پر اعتراض کیا گیا ان میں ایسے الفاظ موجود ہیں جو آپ کا امام ہونا ثابت کرتے ہیں آپ بائیں طرف بیٹھے تو امام مقتدی کے بائیں طرف ہوتا ہے اور اسود کی روایت میں فقعد عن یسار ابی بکر کے الفاظ ہیں اگر ابوبکر (رض) امام ہوتے تو جناب رسول اللہ (صلی اللہ علیہ وآلہ وسلم) ان کے دائیں طرف بیٹھتے آپ کا بائیں طرف بیٹھنا امامت کی واضح دلیل ہے۔
نمبر 2: روایت ابن عباس (رض) میں ہے کہ جناب رسول اللہ (صلی اللہ علیہ وآلہ وسلم) نے قراءت کو وہیں سے شروع کیا جہاں سے ابوبکر (رض) نے چھوڑی تھی تو ابوبکر کا قراءت روک دینا اور آپ کا قراءت شروع کردینا یہ امامت کی واضح دلیل ہے اگر ابوبکر امام ہوتے تو آپ جہراً کیوں پڑھتے اور اگر جہری نماز نہ ہوتی تو آپ کو ابوبکر (رض) کی قراءت کا علم کیوں کر ہوتا اور مقتدیوں کو کیسے معلوم ہوتا کہ ابوبکر (رض) نے قراءت منقطع کردی اور آپ نے شروع کردی ہے اور اس بات پر سب کا اتفاق ہے کہ جہری نمازوں میں امام کے پیچھے قراءت نہیں ہے پس ثابت ہوا کہ جناب رسول اللہ (صلی اللہ علیہ وآلہ وسلم) اس نماز میں امام تھے۔
نظر طحاوی (رح) :
مقتدی جب امام کے ساتھ نماز میں شامل ہوجائے تو اس سے مقتدی پر ایسی نماز لازم ہوجاتی ہے جو اس سے پہلے اس پر چنداں فرض نہ تھی جیسا کہ مسافر جب مقیم امام کی اقتداء کرے تو اس پر چار رکعت پوری کرنی لازم ہیں جو کہ اس پر پہلے واجب نہ تھیں اور اگر کسی پر کوئی فرض پہلے سے لازم تھا تو اقتداء امام کی وجہ سے اس میں کمی نہ آئے گی اور نہ وہ ساقط ہوگا جیسا کہ جب مقیم اگر مسافر امام کی اقتداء کرے تو مقیم کو چار رکعت لازم ہوں گی ان میں کمی نہ آئے گی بلکہ امام کی فراغت کے بعد کھڑے ہو کر وہ اپنی بقیہ نماز پوری کرے گا یہ اس کو لازم ہے۔
اس سے یہ قاعدہ معلوم ہوگیا کہ مقتدی پر اقتداء سے قبل جو فرض واجب ہو وہ اقتداء کے بعد بھی باقی رہتا ہے اقتداء سے ساقط نہیں ہوتا اسی لیے صحت و تندرستی والے پر قیام فرض ہے تو معذور امام کی اقتداء کی وجہ سے فرض قیام مقتدی سے کیوں کر ساقط ہوگا فلہٰذا تندرست مقتدی کا بیٹھ کر نماز پڑھنے والے امام کے پیچھے کھڑے ہو کر نماز پڑھنا لازم ہے۔
ایک ضمنی سوال :
غلام پر جمعہ لازم نہیں ہے اگر وہ جمعہ پڑھ لے تو ظہر کی بجائے اس کو کافی ہوجائے گا اور اس کے ذمہ جو فرض ہے وہ اس سے ساقط ہوجائے گا حالانکہ امام کے ساتھ اس پر جمعہ واجب ہی نہ تھا۔
جواب : جب وہ امام کے ساتھ داخل ہوگیا تو اس پر اس لیے واجب ہوا کہ اس کے امام پر واجب تھا پس وہ ظہر کا بدل بن کر کافی ہوا۔
اسی طرح جب غلام پر جمعہ اس کے جمعہ میں شامل ہونے کی وجہ سے لازم ہوا اور ظہر کی طرف سے بدل کی بناء پر کافی ہوا۔ پس اس سے یہ ثابت ہوا کہ آدمی جب کسی دوسرے کی نماز میں شامل ہوجائے تو کبھی اس پر وہ لازم ہ وجاتا ہے جو اس پر داخلے سے پہلے لازم نہ تھا اور اس سے وہ ساقط نہیں ہوتا جو اس پر پہلے لازم تھا پس اس سے یہ ثابت ہوگیا کہ تندرست پر تو قیام پہلے لازم ہے جب وہ اس شخص کے ساتھ نماز میں شامل ہوا جس سے قیام کا فرض ساقط ہے تو اس کے ساتھ نماز میں شامل ہونے سے اس کا اپنا فرض تو ساقط نہ ہوگا اور وہ قیام ہے۔
یہ امام ابوحنیفہ (رح) اور ابو یوسف (رح) و محمد (رح) کا قول ہے۔ البتہ امام محمد (رح) کا قول یہ ہے کہ تندرست کو مریض کی اقتداء درست نہیں جبکہ وہ رکوع و سجدہ کی طاقت رکھتا ہو۔
اب رہا یہ سوال کہ بہت سی روایات میں جناب رسول اللہ (صلی اللہ علیہ وآلہ وسلم) کا ایام مرض میں بیٹھ کر صحابہ کو نماز پڑھانا ثابت ہے جبکہ صحابہ کرام قیام کی حالت میں تھے تو وہ فرماتے ہیں کہ یہ بات آپ کے ساتھ مخصوص ہے اس میں کئی ایسے افعال بھی ثابت ہیں جو اور کسی کو جائز نہیں مثلاً آپ نے اسی جگہ سے قراءت شروع کردی جہاں سے حضرت ابوبکر (رض) نے چھوڑی اور ایک ہی نماز میں ابوبکر (رض) امام تھے پھر وہ مقتدی بن گئے اور یہ باتیں سب کے ہاں آپ کے بعد کسی کے لیے جائز نہیں ہیں اس سے یہ ثابت ہوا کہ یہ نماز آپ کے ساتھ مخصوص اور دوسروں کو ایسا کرنا درست نہیں۔
نوٹ : امام طحاوی (رح) نے فریق ثانی کے مؤقف کو دلیل سے خوب ثابت و مضبوط کیا مگر اس باب میں ایک انوکھا انداز یہ رکھا کہ امام محمد (رح) کا مسلک بیان کر کے فقط ان کی دلیل تو پیش کردی مگر اس کے متعلق سوال و جواب سے اپنے قلم کو روک لیا شاید ان کا بھی تخصیص کی طرف میلان ہو واللہ اعلم۔