٢٤٩٩: قیس بن ابی حازم سے روایت ہے کہ ہمیں مغیرہ بن شعبہ (رض) نے نماز پڑھائی وہ دو رکعتوں میں (بیٹھنے کی بجائے) کھڑے ہوگئے پس ہم نے سبحان اللہ کہا انھوں نے اشارہ کیا اور سبحان اللہ کہا پھر اپنی نماز کو جاری رکھا جب نماز کو مکمل کر کے سلام پھیرا تو بیٹھ کر سہو کے دو سجدے کئے پھر کہا جناب رسول اللہ (صلی اللہ علیہ وآلہ وسلم) نے ہمیں نماز پڑھائی آپ جلسے سے سیدھے کھڑے ہوگئے اور نماز کے تسلسل کو جاری رکھا پھر جب نماز پوری کرلی تو بیٹھ کر دو سجدے ادا کئے پھر فرمایا جب تم میں سے کوئی نماز پڑھتے ہوئے جلسے سے کھڑا ہوجائے اگر وہ بالکل سیدھا کھڑا نہ ہوا ہو تو وہ بیٹھ جائے اس کے ذمے دو سجدے نہیں اور اگر وہ سیدھا کھڑا ہوگیا تو اپنی نماز کو جاری رکھے اور بیٹھ کر دو سجدے کرے۔ یہ حضرت مغیرہ (رض) ہیں جو جناب رسول اللہ (صلی اللہ علیہ وآلہ وسلم) سے یہ نقل کر رہے ہیں کہ آپ نے نماز میں کمی کی وجہ سے سجدہ سہو سلام کے بعد کیا اور ان احادیث میں کئی وجوہ کا احتمال ہے۔ یہ بھی ممکن ہے کہ اس سے مراد ابن بحینہ اور معاویہ (رض) کی روایات میں مذکورہ وجہ مراد ہو کہ جناب رسول اللہ (صلی اللہ علیہ وآلہ وسلم) نے نقصان و زیادتی دونوں حالتوں میں سجدہ سہو سلام سے پہلے کیا اور یہ بھی جائز ہے کہ وہ صورت مراد ہو جو کہ حضرت مغیرہ (رض) کی روایت میں مذکور ہے کہ آپ اضافے اور نقصان دونوں حالتوں میں آپ سے سجدہ سہو سلام کے بعد فرمایا اور تیسری صورت وہ بھی مراد ہوسکتی ہے جو کہ روایت حضرت عمران و ابوہریرہ (رض) اور ابن عمر (رض) میں مذکور ہے۔ کہ آپ (صلی اللہ علیہ وآلہ وسلم) نے نماز میں اضافے کا سجدہ سہو سلام کے بعد کیا اسی طرح ہر سجدہ سہو جو واجب ہو خواہ اضافہ کی بناء پر یا نقصان کی وجہ سے بلا تفریق اسے آپ نے سلام کے بعد ادا فرمایا۔ اور یہ بھی ہوسکتا ہے کہ ان دونوں میں فرق کیا ہو۔ جب ہم نے غور کیا تو ہم نے حضرت عمر (رض) کو پایا کہ وہ جناب نبی اکرم (صلی اللہ علیہ وآلہ وسلم) کے ساتھ سجدہ سہو میں جو ذوالیدین والے دن پیش آیا ‘ خود شریک تھے وہ سجدہ اضافے کی وجہ سے تھا اور سلام کے بعد تھا اور ہم نے حضرت عمر (رض) کو پایا کہ انھوں نے آپ کے بعد نقصان کی بناء سلام کے بعد سجدہ کیا۔ روایت ذیل میں ہے۔
تخریج : روایت نمبر ٢٤٩٨ کی تخریج دیکھ لی جائے۔
تمام روایات پر طائرانہ نگاہ
اب تک جس قدر روایات گزری ہیں ان میں یہ احتمالات ہیں۔
نمبر 1: حضرت ابن بحینہ ‘ معاویہ (رض) کی روایات میں جناب رسول اللہ (صلی اللہ علیہ وآلہ وسلم) کا سلام سے پہلے سجدہ کرنا مذکور ہے خواہ وہ سجدہ نقصان کی وجہ سے لازم ہوا یا زیادتی کی وجہ سے ان میں کچھ تفاوت نہیں۔
نمبر 2: حضرت مغیرہ (رض) کی روایت میں سلام کے بعد سجدہ مذکور ہے خواہ نقصان کی وجہ سے لازم ہوا ہو یا زیادتی سے لازم ہوا ہو۔
نمبر 3: حدیث عمران بن حصین ‘ ابوہریرہ ‘ ابن عمر (رض) کی روایات میں سجدہ سہو سلام کے بعد ہے خواہ نماز میں زیادتی ہو یا نقصان سجدے کے سلسلے میں کوئی تفاوت و فرق نظر نہیں آتا۔
نمبر 4: فصل ثانی کی روایات میں کمی کی وجہ سے قبل السلام اور زیادتی کی وجہ سے بعدالسلام سہو کے دو سجدے ہیں۔
حاصل کلام :
ان تینوں فصول کی روایات میں یہ چار احتمال موجود ہیں اب کسی نتیجے پر پہنچنے کے لیے کسی دلیل شرعی کی ضرورت ہے چنانچہ غور کے بعد آثار صحابہ (رض) مل گئے جو ایک احتمال کو متعین کر رہے ہیں یہ عمر (رض) ہیں جو ذوالیدین کے واقعہ میں موجود ہیں اور نماز میں اضافہ کی وجہ سے جناب رسول اللہ (صلی اللہ علیہ وآلہ وسلم) کے ساتھ سجدہ سہو بعدالسلام کر رہے ہیں اور جناب رسول اللہ (صلی اللہ علیہ وآلہ وسلم) کی وفات کے بعد نماز میں نقصان پر بھی سجدہ سہو سلام کے بعد کر رہے ہیں۔
روایات و آثار صحابہ (رض) ملاحظہ کریں :