٢٦٥٠: عبیداللہ بن عبداللہ نے ابن عباس (رض) سے نقل کیا کہ جناب رسول اللہ (صلی اللہ علیہ وآلہ وسلم) نے ایک مردہ بکری پائی جو حضرت میمونہ (رض) کی لونڈی کو صدقہ میں دی گئی تھی جناب رسول اللہ (صلی اللہ علیہ وآلہ وسلم) نے فرمایا تم نے اس کی کھال سے فائدہ کیوں نہیں اٹھایا انھوں نے کہا کہ وہ مردہ ہے آپ نے فرمایا اس کا کھانا حرام ہے۔ اس روایت سے یہ دلالت مل گئی کہ بکری کی موت سے جو چیز حرام ہوئی وہ اس کے گوشت کا کھانا ہے نہ کہ پوست اور پٹھا۔ آثار کے پیش نظر اس باب کا یہی مفہوم ہے۔ البتہ نظر و فکر کے لحاظ سے تو ملاحظہ فرمائیں۔ ہم دیکھتے ہیں کہ ایک اتفاقی قاعدہ انگور کے نچوڑ سے فائدہ حاصل کرنا جائز ہے جب تک کہ اس میں شراب کی خصوصیات پیدا نہ ہوں ‘ جب شراب کی صفات اس میں پیدا ہوجائیں تو اس سے وہ حرام ہوجائے گا۔ پھر وہ حرام باقی رہے گا جب تک اس میں سرکہ کی صفات پیدا نہ کی جائیں۔ پس جب اس میں سرکے والی صفات آجائیں گی تو وہ حلال ہوجائے گا۔ تو گویا وہ چند صفات کے آنے سے حرام ہوا اور جدید صفات کے پیدا ہونے سے حلال ہوگیا ‘ جو پہلے سے مختلف تھیں۔ اگرچہ اس کا وجود ایک ہی ہو۔ پس غور و فکر کا تقاضا یہ ہے کہ مردار کے چمڑے کا حال بھی اسی طرح ہو۔ کہ جب اس میں صفات میت پیدا ہوجائیں تو حرام ہوجائے اور جب اس میں برتنے کی چیزوں والی صفات آجائیں تو وہ اس وقت حلال ہوجائیں مثلاً کپڑے وغیرہ۔ جب اس میں دباغت کرلی گئی تو وہ چمڑے اور سامان کی طرح ہوگیا۔ اس سے اس میں حلت کی صفت آگئی۔ اس گزشتہ بات پر قیاس کا تقاضا یہ ہے کہ اس صفت کے آجانے سے وہ حلال ہوجائے۔ ایک اور دلیل سنیے ! ہم دیکھتے ہیں کہ صحابہ کرام (رض) جب اسلام لائے تو آپ (صلی اللہ علیہ وآلہ وسلم) نے ان کو جوتے اور موزے اور چمڑے پھینک دینے کا حکم نہیں فرمایا جن کو انھوں نے زمانہ جاہلیت میں حاصل کیا تھا اور بلاشبہ وہ مردار کی کھال یا ذبیحہ کی کھال سے تھے اور ان کا ذبیحہ بھی تو بت پرستوں کا ذبیحہ ہے۔ بت پرستوں کا ذبیحہ مسلمان کے لیے مردار کا حکم رکھتا ہے۔ پس جب جناب رسول اللہ (صلی اللہ علیہ وآلہ وسلم) نے ان کو پھینکنے کا حکم نہ فرمایا اور ان کو اس سے فائدہ حاصل کرنے دیا۔ اس سے یہ بات ثابت ہوگئی کہ وہ مردار کے حکم سے خارج تھے اور دباغت کی وجہ ان کی نجاست دوسرے سامان کی طرح طہارت میں بدل چکی تھی۔ وہ جناب رسول اللہ (صلی اللہ علیہ وآلہ وسلم) کی معیت میں اسی طرح رہتے تھے جب وہ مشرکین کے کسی علاقہ کو فتح کرتے تو آپ انھیں ان کے موزوں ‘ جوتوں ‘ چمڑوں دیگر کھالوں کو پھینکنے کا حکم نہ فرماتے تھے بلکہ ان کو ان میں سے کسی چیز کے استعمال سے نہ روکتے تھے۔ اس میں ان چمڑوں کے دباغت کے ساتھ پاک ہونے کی دلیل ہے۔ یہ بات حضرت جابر (رض) سے اس طرح مروی ہے۔ ذیل میں ملاحظہ ہو۔
تخریج : بخاری فی الزکوۃ باب ٦١‘ مسلم فی الحیض نمبر ١٠١‘ ابو داؤد فی اللباس باب ٣٨‘ نمبر ٤١٢٠‘ نسائی فی الفرع والعتیرہ باب ٤‘ ابن ماجہ فی اللباس باب ٢٥‘ نمبر ٣٦١٠‘ موطا مالک نمبر ١٦۔
حاصل روایات : مرنے سے بکری کا گوشت حرام ہوا اور وہی مراد ہے کھال اور پٹھے تو کھائے نہیں جاتے کہ وہ اس تحریم کے حکم میں آئیں۔
آثار کے طریقہ سے تو اس باب کا یہ حکم ہے۔ بطریق نظر اس کا حکم ہم بیان کئے دیتے ہیں۔
نظر طحاوی (رح) :
اس بات پر سب کا اتفاق ہے کہ عصیر عنب وغیرہ کو پینا اور اس سے فائدہ حاصل کرنے میں کوئی حرج نہیں جب تک کہ اس میں شراب کی خصوصیات پیدا نہ ہوں جب اس میں شراب کی خصوصیات آجائیں گی تو وہ حرام ہوگا اور پھر وہ حرام ہی رہے گا یہاں تک کہ اس میں سرکہ کی صفات پیدا نہ ہوں جب سرکہ کی صفات آجائیں تو حلال ہوجائے گا۔
تو گویا صفات کے پائے جانے سے اس کے حکم حلت و حرمت میں فرق پڑگیا خواہ وہ ایک ہی شے تھی۔ پس مردار کے چمڑے کا حال بھی کچھ اسی طرح نظر آتا ہے موت کی صفت پیدا ہوتے ہی حرام ہوگیا اور کپڑے وغیرہ استعمالی چیز کی صفت پیدا ہونے سے حلال بن گیا دباغت سے پہلے وہ ناپاک تھا اب دباغت کے بعد وہ پاک ہوگیا۔
نظر ثانی :
جب اصحاب رسول اللہ (صلی اللہ علیہ وآلہ وسلم) ایمان لائے آپ (صلی اللہ علیہ وآلہ وسلم) نے ان کو جوتے ‘ موزے ‘ بچھانے والے چمڑے پھینکنے کا حکم نہیں فرمایا جو انھوں نے زمانہ جاہلیت میں بنائے تھے حالانکہ وہ مردار جانور یا مذبوحہ جانوروں سے حاصل شدہ کھالوں سے بنے ہوئے تھے بلکہ ان کا ذبیحہ بھی بتوں کے نام نیازات کا ذبیحہ تھا اور وہ تو مسلمان کے لیے مردار سے کم درجہ نہیں بلکہ اس سے بڑھ کر ہے۔ جب جناب رسول اللہ (صلی اللہ علیہ وآلہ وسلم) نے ان کو پھینکنے دینے اور ان سے انتفاع ترک کرنے کا نہیں فرمایا تو اس سے یہ ثابت ہوگیا کہ وہ دباغت کی وجہ سے نجاست سے خارج ہوچکے تھے اور ان کا حکم عام سامان کی طرح طہارت کا ہوچکا تھا بالکل اسی طرح جب صحابہ کرام نے مشرکین کے علاقوں کو فتح کیا تو ان کے جوتوں ‘ موزوں اور تمام چمڑوں اور بچھانے والے چمڑوں سے بچنے کا حکم نہیں فرمایا کہ ان میں سے کسی چیز کو مت لو بلکہ ان کی کسی ایسی چیز سے نہیں روکا یہ بھی دلیل ہے کہ دباغت سے ان کے چمڑے وغیرہ پاک ہوگئے۔
اور صحابہ کرام (رض) سے روایات اس کی موید ہیں ملاحظہ ہوں۔