٢٦٥١: عطاء بن ابی رباح نے حضرت جابر بن عبداللہ (رض) سے نقل کیا کہ ہم جناب رسول اللہ (صلی اللہ علیہ وآلہ وسلم) کے ساتھ مشرکین کے غنائم میں مشکیزے پاتے جو مردار کی کھالوں کے ہوتے ہم ان کو باہمی تقسیم کرتے اور ان سے نفع اٹھاتے۔ اس روایت مذکورہ سے یہ دلالت میسر آگئی کہ یہی جابر (رض) یہاں یہ فرما رہے ہیں اور دوسری طرف یہی اس ” لا تنتفعوا۔۔۔“ (الحدیث) والی روایت کے راوی ہیں۔ پس یہ روایت اس روایت کے متضاد نہیں ہوسکتی۔ اس سے یہ بات ثابت ہوگئی کہ ان کی ” لا تنتفعوا۔۔۔“ (الحدیث) والی روایت کا معنی اس روایت سے مختلف ہے اور میتہ کی جو چیز حرام جس کا اس روایت میں تذکرہ ہے وہ اس چیز میں مذکور مباح چیز سے مختلف ہے۔ اسی طرح عبداللہ بن عکیم (رض) نے جو جناب رسول اللہ (صلی اللہ علیہ وآلہ وسلم) سے روایت نقل کی ہے جس میں مردار سے نفع اٹھانا حرام فرمایا وہ اس سے الگ چیز ہے جس کو ان آثار میں مباح قرار دیا گیا یعنی دباغت شدہ کھالیں اور یہ معنی اس لیے مانا تاکہ آثار کا باہمی تضاد ایک دوسرے سے نہ رہے اور یہ جس کی طرف ہم اس باب میں گئے ہیں یعنی دباغت سے مردار کی کھالوں کا پاک ہوجانا ‘ یہ امام ابوحنیفہ ‘ ابو یوسف ‘ محمد (رح) کا قول ہے۔
تخریج : عزاہ العینی الی البزاز۔
پس یہ روایت اس بات کی واضح دلیل ہے جو ہم نے نظر کے عنوان سے ذکر کی ہے اور یہی حضرت جابر (رض) جو جناب رسول اللہ (صلی اللہ علیہ وآلہ وسلم) سے لا تنتفعوا من المیتہ بشیٔ کا ارشاد نقل کرنے والے ہیں پس یہ روایت اس کے متضاد اسی صورت میں نہیں بنتی کہ اس چیز میں جس چیز کو مباح کہا گیا ہے وہ اس سے مختلف ہو جس کی اس میں ممانعت کی گئی ہے اور وہ گوشت ہے اور چربی جس کے انتفاع کی اجازت نہیں اور اس روایت میں کھال پٹھے وغیرہ مراد ہیں جو دباغت کے بعد پاک ہونے کی وجہ سے قابل استعمال بن گئے اسی طرح عبداللہ بن حکیم نے جناب رسول اللہ (صلی اللہ علیہ وآلہ وسلم) سے جو روایت کی ہے اس میں مردار کی جس چیز سے انتفاع کی ممانعت کی گئی ہے وہ اس سے مختلف ہے جس کا دوسری احادیث میں اثبات ہے اور وہ چمڑے ہیں جن کو دباغت دے لی جائے یہ معنی اسی لیے لیا گیا تاکہ آثار میں موافقت ہوجائے یہ بات کہ دباغت کے بعد مردار کی کھال پاک ہوجاتی ہے امام ابوحنیفہ و ابو یوسف و محمد (رح) کا قول ہے۔
اس باب میں عام عادت کے خلاف طحاوی (رح) یکے بعد دیگرے دو نظیریں پیش کی ہیں اور دوسری نظر کے سلسلہ میں عمل صحابی کو ذکر کر کے زوردار انداز سے اس کا معمول بہا ہونا واضح کیا ہے۔