٢٩٣٦: زیاد بن نعیم کہتے ہیں کہ میں نے زیاد بن حارث صدائی کو کہتے سنا کہ جناب رسول اللہ (صلی اللہ علیہ وآلہ وسلم) نے مجھے میری قوم پر امیر بنایا میں نے عرض کیا مجھے ان کے صدقات میں سے کچھ عنایت فرمائیں آپ نے دے دیا اور میرے لیے اس سلسلے میں ایک تحریر کروا کر عنایت فرمایا اس وقت آپ کی خدمت میں ایک آدمی آیا اور اس نے کہا یارسول اللہ (صلی اللہ علیہ وآلہ وسلم) مجھے صدقہ میں سے کچھ دیں پس جناب رسول اللہ (صلی اللہ علیہ وآلہ وسلم) نے فرمایا اللہ تعالیٰ نے کسی نبی اور غیر نبی کے فیصلے کو صدقات کے سلسلہ میں پسند نہیں کیا یہاں تک کہ آسمان سے اس کے متعلق فیصلہ اتار دیا اور اس کو آٹھ اقسام پر بانٹ دیا اگر تم ان میں سے ہو تو میں تجھے دے دیتا ہوں۔ امام طحاوی (رح) فرماتے ہیں یہ حضرت صدائی (رض) ہیں جن کو جناب رسول اللہ (صلی اللہ علیہ وآلہ وسلم) نے اپنی قوم پر عامل بنایا اور یہ بات ناممکن ہے کہ آپ اس کو امیر بنائیں اور وہ اپاہج ہوں۔ آپ سے انھوں نے اپنی قوم کے صدقات میں سوال کیا اور وہ اس قوم کے اموال زکوۃ تھے تو آپ نے ان کو اس میں سے عنایت فرمایا اور ان کے قوی و صحت مند ہونے کی وجہ سے منع نہ فرمایا ۔ پھر اس کے بعد دوسرے آدمی نے سوال کیا ۔ تو جناب رسول اللہ (صلی اللہ علیہ وآلہ وسلم) نے فرمایا ۔ اگر تم ان لوگوں میں شامل ہو جن پر اللہ تعالیٰ نے صدقہ کو تقسیم کرنے کا حکم دیا تو میں تمہیں اس میں سے دیتا ہوں۔ پس جناب رسول اللہ (صلی اللہ علیہ وآلہ وسلم) نے صدقہ کا حکم ان لوگوں کی طرف لوٹا دیا جن کی اللہ تعالیٰ نے لوٹایا ہے۔ انما الصدقات للفقراء والمساکین ۔۔۔ پس ہر وہ شخص جو ان اصناف کے تحت داخل ہوگا اس پر صدقہ درست ہوگا۔ جن کا تذکرہ اللہ تعالیٰ اپنی کتاب اور اس کے رسول اللہ (صلی اللہ علیہ وآلہ وسلم) اپنی سنت میں فرماتے ہیں خواہ وہ شخص اپاہج ہو یا تندرست ۔ ہمارے لیے فصل اول میں مذکورہ آثار میں وہی معنیٰ لا تحل الصدقۃ ۔۔۔ کا لینا مناسب ہے جو ہم نے بیان کیا ہے۔ تاکہ اس کا مفہوم آیت مح کہ اور دیگر احادیث باہر نہ نکلے۔ بلکہ تمام کا معنیٰ ایک ہو جو ایک دوسرے پر صادق آسکے دوسری بات یہ ہے کہ حضرت قبیصہ بن المخارق (رض) کی جناب رسول اللہ (صلی اللہ علیہ وآلہ وسلم) سے منقولہ روایت بھی اسی بات پر دلالت کرتی ہے۔
تخریج : ابو داؤد فی الزکوۃ باب ٢٤‘ نمبر ١٦٣٠۔
یہ زیاد بن حارث کو جناب رسول اللہ (صلی اللہ علیہ وآلہ وسلم) نے صداء قبیلہ کا امیر مقرر فرمایا پھر انھوں نے آپ سے قوم کے صدقات سے کچھ سوال کیا تو آپ نے عنایت فرما دیا ان کے تندرست ہونے کی وجہ سے ممانعت نہیں فرمائی پھر دوسرے نے سوال کیا تو اس کو جناب رسول اللہ (صلی اللہ علیہ وآلہ وسلم) نے فرمایا اگر تو مستحقین سے ہے تو میں تجھے دے دیتا ہوں تو جناب رسول اللہ (صلی اللہ علیہ وآلہ وسلم) نے بھی زکوۃ کے حقدار انہی کو قرار دیا جن کو قرآن مجید نے مستحق کہا۔ انماالصدقات للفقراء الایۃ (التوبہ ٦٠) ان اصناف میں سے جس میں وہ شامل ہوگا مستحق بن جائے گا خواہ وہ لنگڑا ہو یا صحت مند۔
پس بہتر یہ ہے کہ فصل اول کی روایات کو اسی پر محمول کیا جائے جو معنی ہم کر آئے ہیں تاکہ روایات کا توافق ہوجائے اور سب کا ایک معنی ہو کر روایات اکٹھی ہو سکیں اور ان کا معنی ایک دوسرے سے متضاد ہونے کی بجائے ایک دوسرے کی تصدیق کرے۔