٢٩٦٠: عبیداللہ نے رائطہ بنت عبداللہ جو ابن مسعود (رض) کی بیوی تھی روایت کی ہے یہ بہت دستکار عورت تھی اور ابن مسعود (رض) کے پاس بالکل مال نہ تھا یہ اپنی محنت کے کام سے ان پر اور اپنی اولاد پر خرچ کرتی تھیں ایک دن کہنے لگیں مجھے تو اور تیری اولاد نے صدقہ سے مشغول کردیا میں تمہارے خرچ کے ہوتے ہوئے صدقہ نہیں کرسکتی ابن مسعود (رض) کہنے لگے اگر اس خرچہ کا تمہیں اجر نہ ملے تو پھر میں اس خرچ کرنے کو پسند نہیں کرتا (یعنی تم نہ کرو) جناب عبداللہ نے اور زینب (رض) دونوں نے جناب رسول اللہ (صلی اللہ علیہ وآلہ وسلم) سے دریافت کیا کہ میں دستکار عورت ہوں وہ چیزیں میں فروخت کرتی ہوں میرے خاوند اور اولاد کے پاس مال نہیں ان پر خرچ نے مجھے صدقے سے روک دیا ہے میں صدقہ نہیں کرسکتی کیا مجھے ان پر خرچ میں اجر وثواب ملے گا یا نہیں ؟ آپ نے فرمایا تمہیں اس میں اجر ملے گا جو ان پر خرچ کرو گی تم خرچ کرتی رہو۔ اس روایت میں اس بات کی وضاحت ہے کہ وہ صدقہ زکوۃ سے نہ تھا اور ریطہ یہ وہی زینب ہیں جو کہ ابن مسعود (رض) کی زوجہ محترمہ ہیں۔ ہمارے علم میں یہ بات نہیں کہ جناب رسول اللہ (صلی اللہ علیہ وآلہ وسلم) کے زمانہ میں ابن مسعود (رض) کی زینب کے علاوہ کوئی اور بیوی ہو۔ اور اس بات کی دلیل کہ وہ صدقہ نفلیہ تھا جیسا کہ ہم نے ذکر کیا ان کا یہ قول ہے کنت امراۃ صنعاء اصنع بیری فابیع من ذلک فانفق علی عبداللہ ‘ ‘ کہ میں دست کاری سے واقف عورت تھی پس میں اپنے ہاتھ سے کام کر کے اس کو فروخت کرتی اور اسے اپنے اوپر اور عبداللہ پر خرچ کرتی ۔ پس جناب رسول اللہ (صلی اللہ علیہ وآلہ وسلم) کا ارشاد جو اس روایت اور اس سے پہلی روایت میں وارد ہے وہ اس کے اسی کمائی کے مال سے متعلق سوال ہے اور اس حدیث ربطہ میں یہ الفاظ ” کنت انفق من ذلک علی عبداللہ وعلی ولدہ منی “ کہ اس سے عبداللہ اور اپنی اولاد پر خرچ کرتی ہوں۔ اور اس پر تو تمام کا اجماع ہے کہ عورت کو اپنی اولاد پر زکوۃ کا خرچ کرنا جائز نہیں ہے پس جب وہ اس میں سے اپنی اولاد پر خرچ کرتی ہیں تو اس کا زکوۃ سے نہ ہونا ظاہر ہوا پس اسی طرح جو وہ عبداللہ پر خرچ کرتی ہیں وہ بھی زکوۃ سے نہ ہو اور حدیث ابوہریرہ (رض) میں جو جناب نبی اکرم (صلی اللہ علیہ وآلہ وسلم) سے وارد ہوئی ہے۔ وہ بھی اس بات پر دلالت کرتی ہے کہ وہ صدقہ جس کو جناب رسول اللہ (صلی اللہ علیہ وآلہ وسلم) نے اس عورت کے لیے مباح قرار دیا کہ وہ اپنے خاوند پر خرچ کرے وہ زکوۃ کے علاوہ تھا ۔ روایت ذیل میں ہے۔
تخریج : بخاری فی الزکوۃ باب ٤٦۔
اس صدقہ سے مراد زکوۃ نہیں بلکہ نفلی صدقات ہیں جیسا کہ اس قرینہ سے ظاہر ہوتا ہے میں ایک دستکار عورت ہوں اس کمائی سے میں اپنے خاوند اور اولاد پر صرف کرتی ہوں اب زکوۃ تو سال کے بعد آتی ہے جب بھی کوئی کمائی کرے اسی وقت ہی لازم تو نہیں ہوجاتی پس آپ (صلی اللہ علیہ وآلہ وسلم) کا ارشاد پہلی روایت کے لیے کافی جواب ہے کہ تمہیں ان پر مال خرچ کرنے سے دوہرا ثواب ملے گا خرچ کرتی رہو پس جس خرچہ کی آپ نے اجازت مرحمت فرمائی وہ زکوۃ نہ تھا اور غیر زکوۃ کے صرف میں کسی کو اختلاف نہیں بلکہ ہمارے پاس تو ابوہریرہ (رض) کی روایت موجود ہے جو اس بات پر صاف دلالت کرتی ہے کہ زینب ثقفیہ (رض) کے لیے مباح کیا جائے والا خرچہ وہ زکوۃ نہ تھا روایت آتی ہے۔