٢٩٥٩: عمرو بن حارث نے ابن مسعود (رض) کی بیوی زینب ثقفیہ (رض) سے نقل کیا (یہ روایت شقیق عن عمرو اور ابو عبید عن عمرو دونوں اسناد سے ایک جیسی ہے۔ زینب کہتی ہیں کہ مجھے حضور (صلی اللہ علیہ وآلہ وسلم) نے مسجد میں دیکھ کر فرمایا تم عورتیں صدقہ کرو خواہ اپنے زیورات سے کرنا پڑے یہ زینب اپنے خاوند عبداللہ اور پرورش میں لیے ہوئے چند یتامیٰ پر اپنا مال خرچ کرتیں انھوں نے اپنے خاوند عبداللہ کو کہا کیا میرے لیے تجھ پر صدقہ خرچ کرنا درست ہوجائے گا اور اسی طرح ان زیر پرورش یتیموں پر ؟ (انہوں نے تو دریافت نہ کیا) پس میں خود جناب رسول اللہ (صلی اللہ علیہ وآلہ وسلم) کی خدمت میں پہنچی تو وہاں ایک اور انصاری عورت اپنی ضرورت کی خاطر آپ کے دروازہ پر تھی دونوں کا کام ایک تھا ہمارے پاس سے بلال کا گزر ہوا تو میں نے کہا کہ ہماری طرف سے جناب رسول اللہ (صلی اللہ علیہ وآلہ وسلم) سے دریافت کر دو کیا مجھے صدقہ کا مال اپنے خاوند اور زیر سرپرستی یتامیٰ پر خرچ کرنا جائز ہے یا نہیں ؟ اور تم ہمارے نام مت بتلانا زینب کہتی ہیں وہ داخل ہوئے اور آپ سے دریافت کیا تو آپ نے فرمایا وہ دونوں کون کون ہیں ؟ انھوں نے کہا وہ زینب ہے۔ آپ نے فرمایا وہ کون سی زینب ہے ؟ انھوں نے کہا ابن مسعود (رض) کی بیوی ! آپ نے فرمایا ہاں اس کو قرابت اور صدقے دونوں کا اجر ہوگا۔ امام طحاوی فرماتے ہیں کہ بعض علماء نے اس سے یہ استدلال کیا کہ عورت اپنے خاوند کو زکوۃ دے سکتی ہے اور یہ قول امام ابو یوسف ‘ محمد جواب نے اختیار کیا۔ دیگرعلماء نے ان کی بات سے اختلاف کرتے ہوئے کہا کہ کسی عورت کو جائز نہیں کہ وہ اپنے خاوند کو زکوۃ دے جیسا کہ کسی مرد کو جائز نہیں کہ وہ اپنی بیوی کو زکوۃ دے اور پہلے قول والوں کے خلاف انھوں نے اسی حدیث زینب (رض) سے استدلال کرتے ہوئے کہا کہ یہ صدقہ جس پر اس حدیث میں آمادہ کیا گیا وہ زکوۃ کے علاوہ ہے اور اس کی وضاحت اس روایت ذیل میں ملاحظہ ہو۔
تخریج : بخاری فی الزکوۃ باب ٣٣‘ ٤٨‘ مسلم فی العیدین نمبر ٤‘ والزکوۃ ٤٦‘ ترمذی فی الزکوۃ باب ١٢‘ نسائی فی الزکوۃ باب ١٩‘ ٨٢‘ دارمی فی الصلاۃ باب ٢٢٤‘ الزکوۃ باب ٢٣‘ مسند احمد ١؍٣٧٦۔
اس روایت سے ثابت ہوتا ہے کہ بیوی کو اپنے خاوند پر زکوۃ خرچ کرنے میں کوئی حرج نہیں بلکہ اسے زیادہ ثواب ملے گا اور زکوۃ بھی ادا ہوجائے گی۔
استدلال کا جواب : لفظ صدقہ سے استدلال کر کے زکوۃ مراد لینا اس روایت میں درست نہیں بلکہ اس سے غیر واجب صدقات مراد ہیں جس کی دلیل اگلی روایت ہے ملاحظہ کریں۔