٣٠١٩: خصیف نے مجاہد سے نقل کیا کہ میں نے ان سے کھانے کی اشیاء کے صدقہ سے متعلق سوال کیا تو انھوں نے فرمایا اس کے قلیل و کثیر میں عشر اور نصف عشر ہے۔ درست غور وفکر بھی اسی بات پر دلالت کرتا ہے کہ ہم یہ جانتے ہیں کہ اموال اور مویشوں میں زکوۃ کی مقررہ مقدار سال گزرنے کے بعد لازم ہے۔ تو ان اشیاء میں ایک مقدار معلوم ایک مخصوص وقت میں لازم ہے پھر ہم یہ بھی جانتے ہیں کہ زمین کی پیداوار میں جو زکوۃ لی جاتی ہے وہ اسی وقت ہے جب وہ پیداوار ہو اس کے لیے کسی وقت کا انتظار نہیں کیا جاتا جب اس کی زکوۃ کے لیے وقت ساقط ہوگیا تو اس کی مقدار واجبہ بھی ساقط ہونی چاہیے جس تک پہنچنے پر زکوۃ دی جائے ۔ پس اس میں وقت و مقدار کا حکم یکساں ہوگا جب ایک ساقط ہوگا تو دوسرا بھی ساقط ہوجائے گا ۔ جیسا کہ مذکورہ اموال میں یہ دونوں چیزیں برابر ہیں۔ کہ جب ایک ثابت ہو تو دوسری بھی ثابت ہوجائے نظر کا یہی تقاضا ہے یہی امام ابوحنیفہ (رح) کا قول ہے۔
نظر طحاوی (رح) :
جانوروں اور اموال تجارت اور اموال باطنہ میں وجوب زکوۃ کے لیے سال گزرنے کی شرط ہے مالک نصاب ہونا کافی نہیں ہے اور پیداوار زمینی میں وجوب عشر کے لیے سال بھر گزرنے کی شرط کسی کے ہاں بھی نہیں بلکہ جس وقت پیداوار تیار ہوجائے اسی وقت لازم ہے اور مویشی اور اموال تجارات میں بھی حولان حول کی شرط ہے اور مقدار نصاب بھی شرط کی گئی ہے پس پیداوار اراضی میں جس طرح سال گزرنے کی شرط نہیں ہے بالکل اس میں نصاب کی مقدار کی شرط پانچ وسق وہ بھی نہ ہوگی۔ جس میں ایک شرط لازم ہوتی ہے اس میں دوسری شرط بھی ساتھ لازم ہوتی ہے اور جس میں ایک شرط نہیں ہے اس میں دوسری شرط بھی ساتھ لازم نہیں ہوگی۔
یہی امام ابوحنیفہ کا مسلک ہے اور احوط مسلک یہی ہے۔
اصطلاحات کی وضاحت :
وسق : ایک وسق کا وزن ایک کو نٹل ٨٨ کلو ٩٥٦ کرام ٨٠٠ ملی گرام ہوتا ہے ٥ وسق کا وزن ٩ کو نٹل ٤٤ کلو ٧٨٤ گرام۔
صاع : ١٢ ماشہ کے تولہ سے ٢٧٠ تولہ ہوتا ہے۔ ٣ کلو ١٤٩ گرام ٨٠٠ ملی گرام ہے۔
تولہ : ١٢ ماشے۔ ١١ گرام ٦٦٤ ملی گرام ہے۔ ایضاح النوادر ص ١٨ ج ١۔
اوقیہ : ٤٠ درہم ٥ اوقیہ۔ ٢٠٠ درہم۔
١۔ تولہ۔ ١٢٢ گرام ٤٧٢ ملی گرام جبکہ تولہ ١٢ ماشہ کا ہو۔ (مترجم)
فریق اوّل کی روایات پانچ صحابہ سے مروی ہیں اور فریق ثانی کی روایات تین صحابہ کرام سے مروی ہیں فریق دوم کی روایات میں معاذ بن جبل (رض) کی روایت کی وجہ سے وزن زیادہ ہے کیونکہ وہ وفات سے تھوڑے دنوں پہلے کی ہے واللہ اعلم بالصواب امام طحاوی (رح) کا رجحان فریق ثانی کی طرف ہے۔