٣٠٢٣: عبدالرحمن بن مسعود بن دینار نے سہل بن ابی حثمہ (رض) سے نقل کیا کہ جناب رسول اللہ (صلی اللہ علیہ وآلہ وسلم) نے فرمایا جب تم اندازہ کرلو تو کم از کم ثلث کو چھوڑ دو اور اگر تم ثلث نہ چھوڑو تو ربع تو ضرور چھوڑ دو ۔ ہمیں معلوم ہوگیا کہ یہ اس وقت کا حکم نہیں جب زکوۃ لی جائے کیونکہ جب پھل کی مقدار اتنی ہوجائے جس پر زکوۃ لازم ہے تو جتنی زکوۃ لازم ہے اس سے کم نہیں کیا جاسکتا بلکہ پورے واجب کو وصول کیا جائے گا اس پر پوری امت کا اتفاق ہے تو اس روایت میں جتنی مقدار کو چھوڑنے کا تذکرہ ہے تو وہ اس وقت کی بات ہے جب زکوۃ کی ادائیگی سے پہلے مالکوں کو اس سے کھانے کی ضرورت پڑتی ہے تو اندازہ لگانے والے کو حکم دے دیا کہ پھل کی جس مقدار کا وہ اندازہ لگائیں اس میں ثلث یا ربع کو چھوڑ دیں تاکہ باغات کا عشر وصول کرتے ہوئے اس کو حساب میں شامل نہ کیا جائے ۔ حضرت فاروق اعظم (رض) اندازہ لگانے والے کو اس بات کا حکم فرماتے تھے ‘ جیسا کہ اگلے اثر سے واضح ہے۔
تخریج : ترمذی فی الزکوۃ باب ١٧‘ نمبر ٦٤٣‘ نسائی فی الزکوۃ باب ٢٦‘ دارمی فی البیوع باب ٧٦‘ مسند احمد ٣؍٤٤٨‘ ٤؍٢‘ ٣۔
اس روایت سے معلوم ہوتا ہے کہ یہ اندازہ اس وقت نہیں جبکہ زکوۃ لی جاتی ہے کیونکہ اگر وہ پھل اسی اندازے کے مطابق کٹنے کے وقت نکل آیا تو اس وقت اس میں سے کچھ کم نہ کیا جائے گا اس کے تمام پر عشر ہوگا اس پر تو تمام امت مسلمہ کا اتفاق ہے۔
بقیہ وہ کمی جس کا تذکرہ اس روایت میں وارد ہے وہ پھل کے پکنے کے قریب قریب ہونے کے موقعہ پر ہے اور وہ زکوۃ سے پہلے کا زمانہ ہے۔
پس اس سے ثابت ہوا کہ اندازے کا حکم اسے کٹائی سے پہلے ہے اسی لیے خراص کو ثلث یا ربع منہا کرنے کا حکم دیا تاکہ وہ بوقت زکوۃ اس میں شمار نہ ہو اور حضرت عمر (رض) سے بھی یہ مروی ہے کہ وہ خراص کو یہ حکم فرماتے تھے۔