٣٠٦٨: موسیٰ جہنی نے مجاہد سے نقل کیا کہ ہم حضرت عائشہ (رض) کی خدمت میں حاضر ہوئے ہم میں سے بعض نے پانی مانگا تو انھوں نے بڑی ہنڈیا یا بڑا پیالہ منگوایا حضرت عائشہ (رض) فرمانے لگیں جناب نبی اکرم (صلی اللہ علیہ وآلہ وسلم) اس جیسے برتن کی مقدار پانی سے غسل فرما لیتے تھے میں نے اس کو ماپا تو پیمائش میں وہ آٹھ رطل ‘ نو رطل ‘ دس رطل کے برابر تھا۔ امام طحاوی (رح) فرماتے ہیں کہ بعض علماء اس طرف گئے ہیں کہ صاع کا وزن آٹھ رطل ہے۔ انھوں نے اس روایت کو دلیل بنایا ہے۔ ان کا کہنا یہ ہے کہ امام مجاہد (رح) نے اٹھ رطل میں شک ظاہر نہیں کیا البتہ زائد میں شک ظاہر کیا تو اس روایت نے آٹھ رطل کو ثابت اور زائد کی نفی کردی ۔ اس بات کو اختیار کرنے والوں میں امام ابوحنیفہ (رح) بھی ہیں۔ مگر دوسرے علماء نے ان سے اختلاف کرتے ہوئے کہا کہ صاع کا وزن پانچ رطل اور رطل ہے۔ امام ابو ایوسف بھی اس قول کو اختیار کرنے والے ہیں ان کا کہنا یہ ہے کہ آپ جس پانی سے غسل فرماتے وہ ڈیڑھ صاع تھا اور انھوں نے ذیل کی روایات ذکر کیں۔
تخریج : نسائی فی الطہارۃ باب ١٤٣‘ مسند احمد ٦؍٥۔
لغات : العس بڑی ہنڈیا یا بہت بڑا پیالہ۔
صاع کا وزن آٹھ رطل ہے جیسا اس روایت میں موجود ہے مجاہد کو نو اور دس میں شک ہے مگر آٹھ تو متعین ہے پس صاع کا وزن آٹھ رطل ہوا۔
فریق ثانی کا مؤقف اور دلائل و جواب : صاع کا وزن ٥ رطل اور ثلث رطل ہے اور یہی وہ پانی کی مقدار ہے جس سے جناب نبی اکرم (صلی اللہ علیہ وآلہ وسلم) غسل فرماتے تھے اور اس کی مقدار ڈیڑھ صاع ہے جیسا ان روایات میں ہے۔

صاع کی مقدار میں اختلاف ہے جو کہ گہری نگاہ ڈالنے سے لفظی رہ جاتا ہے اس کو سامنے رکھ کر عرض کرتے ہیں کہ امام ابوحنیفہ ‘ محمد ‘ ابراہیم ‘ نخعی رحمہم اللہ کے ہاں صاع آٹھ رطل کا ہوتا ہے۔
نمبر 2: امام ابو یوسف ‘ شافعی ومالک ‘ احمد رحمہم اللہ کے ہاں پانچ رطل اور ثلث رطل صاع کا وزن ہے۔
دراصل عراقی آٹھ رطل کا وزن ایک ہزار چالیس درہم کے مساوی ہے اسی طرح مدنی ٥ رطل اور ثلث کا بھی ایک ہزار چالیس درہم کے برابر وزن ہے۔
فریق اوّل کا مؤقف اور دلائل : عراقی صاع کا وزن آٹھ رطل ہے اس سے کم زیادہ نہیں دلیل یہ روایت ہے۔