٣٣١٨: ابو قیس مولیٰ عمرو بن العاص کہتے ہیں کہ مجھے عبداللہ بن عمر (رض) نے امّ سلمہ (رض) کی خدمت میں بھیجا کہ ان سے پوچھ آئیں کہ کیا جناب رسول اللہ (صلی اللہ علیہ وآلہ وسلم) روزے کی حالت میں ان کا بوسہ لے لیا کرتے تھے چنانچہ میں امّ سلمہ (رض) کی خدمت میں آیا اور ابن عمر کا سلام ان کو پہنچایا۔ اور میں نے کہا کیا جناب رسول اللہ (صلی اللہ علیہ وآلہ وسلم) روزے کی حالت میں بوسہ لے لیا کرتے تھے انھوں نے کہا نہیں۔ میں نے کہا عائشہ (رض) نے لوگوں کو خبر دی ہے کہ آپ روزے کی حالت میں بوسہ لے لیا کرتے تھے وہ کہنے لگیں شاید ان سے متعلق ایسا ہو کیونکہ اس کی محبت کے بارے میں آپ اختیار نہ رکھتے تھے (یعنی ان سے شدید محبت تھی) یعنی ان کا بوسہ لیا ہو عین ممکن ہے مگر میرے سلسلہ میں یہ بات پیش نہیں آئی۔ جناب رسول اللہ (صلی اللہ علیہ وآلہ وسلم) سے کثیر روایات سے یہ بات ثابت ہوگئی کہ آپ حالت روزہ میں بوسہ لے لیا کرتے تھے ۔ اس سے یہ ثبوت مسیر آگیا کہ بوسہ سے روزہ نہیں ٹوٹتا۔ اگر کوئی معترض یہ کہے کہ یہ جناب رسول اللہ (صلی اللہ علیہ وآلہ وسلم) کی خصوصیت تھی ۔ کیا تم حضرت صدیقہ (رض) کے اس قول کو نہیں جانتے وایکم کان املک لا ربہ من رسول اللہ (صلی اللہ علیہ وآلہ وسلم) ‘ ‘ کہ تم میں سے کس کو آپ کی طرح اپنے اوپر قابو ہے۔ اس کے جواب میں یہ کہا جائے ۔ کہ حضرت عائشہ صدیقہ (رض) کا یہ قول اس بات پر دلالت کررہا ہے ان کو ان لوگوں کے نفوس کے سلسلہ میں اطمینا نہ تھا ۔ جو اطمینان جناب رسول اللہ (صلی اللہ علیہ وآلہ وسلم) کو اپنے نفس پر تھا کیونکہ آپ معصوم و محفوظ تھے ۔ رہی اس بات کی دلیل کہ بوسہ آپ کے ہاں افطار صوم کا باعث نہ تھا۔ گزشتہ سطور میں ذکر کیا فاما انتم فلا باس بہ للشیخ الکبیر ۔ الحدیث باقی رہے تم تو بوڑھے کمزور کے لیے کچھ حرج نہیں۔ ان کا مقصد اس سے یہ ہے کہ جس کو اپنے متعلق شہوت کا ڈرنہ ہو اور اسے اپنے اوپر اطمینان ہو تو بوسہ اس کے لیے جائز ہے۔ ہم نے بعض روایات انہی سے ذکر کیں کہ ان سے روزہ دار کے بوسہ سے متعلق پوچھا گیا تو انھوں نے اس سوال کے جواب میں فرمایا کہ جناب رسول اللہ (صلی اللہ علیہ وآلہ وسلم) روزہ کی حالت میں بوسہ لے لیا کرتے تھے ۔ اگر جناب رسول اللہ (صلی اللہ علیہ وآلہ وسلم) کا حکم لوگوں کے متعلق اس سے مختلف ہوتا تو پھر وہ اس کا جواب آپ عمل سے ظاہر ہونے والا نہ دیتیں اور ابن عمر (رض) نے ان سے اس وقت سوال کیا جب کہ ان کے والد نے ان کے گھر والوں کو رمضان المبارک میں ایک جگہ جمع کیا تو انھوں نے فرمایا کہ ” کان رسول اللہ (صلی اللہ علیہ وآلہ وسلم) یفعل ذلک “ کہ جناب رسول اللہ (صلی اللہ علیہ وآلہ وسلم) یہ عمل کرتے تھے۔ ہمارے ہاں اس کی تاویل یہ ہے کہ وہ ابن عمر (رض) کے متعلق مطمئن تھیں ۔ پس اس سے یہ دلالت مل گئی کہ اس میں جناب رسول اللہ (صلی اللہ علیہ وآلہ وسلم) اور دیگر لوگوں کا حکم بوسہ کے سلسلہ میں برابر ہے جب کہ اس کو اس بات کا خوف نہ ہو جس کی طرف بوسہ دعوت دیتا ہے۔ اور نظر کے لحاظ سے بھی اسی طرح حکم رکھتا ہے کیونکہ ہم یہ بات پاتے ہیں کہ روزے کی حالت میں جناب رسول اللہ (صلی اللہ علیہ وآلہ وسلم) پر کھانا ‘ پینا اور جماع اسی طرح حرام تھا جیسا دوسرے لوگوں پر ۔ پھر یہ بوسہ جناب رسول اللہ (صلی اللہ علیہ وآلہ وسلم) کے لیے حلال تھا۔ تو نظر و فکر کا تقاضایہ ہے کہ ہماری مذکورہ بات کے مطابق یہ تمام لوگوں کے لیے بھی جائز و حلال ہو اور آپ کا حکم اور باقی امت کا حکم اس میں برابر ہو جیسا بقیہ امور میں برابر ہے اور جناب رسول اللہ (صلی اللہ علیہ وآلہ وسلم) سے ایسی روایات مروی ہیں جو اس بات پر دلالت کرتی ہیں کہ اس میں آپ کا اور امت کا حکم برابر ہے۔ ذیل میں ملاحظہ کریں۔
ان تمام روایات سے ثابت ہوتا ہے کہ بوسہ سے روزہ نہیں ٹوٹتا جبکہ اس سے کسی اگلے فعل کا ارتکاب نہ کرے اور نہ اس میں مبتلا ہو۔
سرسری اشکال :
یہ تو جناب رسول اللہ (صلی اللہ علیہ وآلہ وسلم) کی خصوصیت معلوم ہوتی ہے جیسا کہ ایکم کان املک لاربہ من رسول اللہ ا ؟ کے لفظ اس پر دلیل ہیں۔
الجواب بالصواب :
حضرت عائشہ (رض) نے یہ بات ان کے نفوس پر عدم اطمینان کا اظہار کرتے ہوئے کہی اور ظاہر ہے کہ ان کو بھی اپنے نفوس پر وہ اعتماد حاصل نہ تھا جو جناب رسول اللہ (صلی اللہ علیہ وآلہ وسلم) کو اپنی ذات پر تھا کیونکہ آپ تو معصوم و محفوظ من اللہ تھے۔
باقی بوسہ ان کے ہاں بھی روزہ کے لیے مفطر نہ تھا جیسا فاما انتم۔ فلا بأس بہ للشیخ الکبیرالضعیف کا قول بتلا رہا ہے ان کی مراد یہ تھی کہ آپ کو اپنی خواہش کے سلسلہ میں خطرہ نہ تھا چنانچہ جس کو خطرہ نہ ہو کہ اس کی خواہش غالب آ کر اگلے کام میں مبتلا کر دے گی تو اس کے لیے مباح اور جائز ہے بعض آثار میں ان سے سوال کرنے پر انھوں نے فرمایا کہ آپ (صلی اللہ علیہ وآلہ وسلم) روزہ کی حالت میں بوسہ لے لیا کرتے تھے اگر ان کے ہاں اور لوگوں کا حکم الگ ہوتا تو وہ جناب رسول اللہ (صلی اللہ علیہ وآلہ وسلم) کا فعل ان کے جواب میں نقل نہ فرمائیں یہ فعل نقل کرنا اس بات کی واضح دلیل ہے کہ دوسرے لوگوں کا بھی حکم یہی ہے اور عبداللہ بن عمر نے خود اپنے متعلق اس قسم کا سوال کیا تو انھوں نے فعل رسول اللہ (صلی اللہ علیہ وآلہ وسلم) سے جواب دیا معلوم ہوا کہ دوسرے لوگوں کا حکم بھی یہی تھا کہ بوسہ مفطر صوم نہیں ہے۔
اور ہمارے ہاں یہ حکم اس لیے تھا کہ آپ کو اپنی خواہش پر پوری قدرت تھی اور عائشہ (رض) کی روایات سے یہ دلالت بھی ملتی ہے کہ جب خواہش کا خوف نہ ہو تو یہی حکم ہے اور خوف ہو تو باز رہے جس طرح روایات سے یہ بات ثابت ہے تقاضائے نظر بھی اسی طرح ہے۔
نظر طحاوی (رض) :
روزے کی حالت میں کھانا ‘ پینا ‘ جماع یہ سب چیزیں جس طرح جناب رسول اللہ (صلی اللہ علیہ وآلہ وسلم) پر حرام تھیں اسی طرح تمام امت پر بھی روزے کی حالت میں یہ حرام ہیں اور روزے کی حالت میں جب بوس و کنار آپ کے لیے حلال ہے تو بلا کراہت امت کے لیے بھی حلال ہونا چاہیے پس جس طرح جماع میں حکم یکساں ہے اسی طرح بوسہ میں بھی حکم یکساں ہونا چاہیے ۔ یہ روایات مزید اس پر دلالت کرتی ہیں۔