٣٣١٩: زید بن اسلم نے عطاء بن یسار سے نقل کیا کہ ایک آدمی نے روزے کی حالت میں اپنی بیوی کا بوسہ لیا پھر اسے اس کا بہت غم ہوا اس نے اپنی بیوی کو بھیجا تاکہ وہ اس سلسلہ میں پوچھے۔ وہ امّ سلمہ (رض) امّ المؤمنین کی خدمت میں گئی اور اس کا تذکرہ کیا تو امّ سلمہ (رض) نے اسے اطلاع دی کہ آپ روزے کی حالت میں بوسہ لیتے تھے۔ وہ لوٹ کر اپنے خاوند کے ہاں آئی اور اس کو اطلاع دی مگر اس بات نے اس کے غم کو اور بڑھا دیا وہ کہنے لگا ہم تو جناب رسول اللہ (صلی اللہ علیہ وآلہ وسلم) کی طرح نہیں اللہ تعالیٰ اپنے رسول کے لیے جو چیز چاہے حلال کرے وہ عورت دوبارہ لوٹ کر امّ سلمہ (رض) کی خدمت میں گئی تو اس نے جناب رسول اللہ (صلی اللہ علیہ وآلہ وسلم) کو ان کے مکان میں پایا آپ نے فرمایا اس عورت کا کیا معاملہ ہے امّ سلمہ (رض) نے آپ کو اطلاع دی تو آپ نے فرمایا کیا تم نے اس کو نہیں بتلایا کہ میں ایسا کرتا ہوں امّ سلمہ (رض) کہنے لگیں میں نے اس کو اطلاع دی ہے مگر یہ اپنے خاوند کے ہاں گئی اور اس کو اس بات کی اطلاع دی تو اس کے غم میں اضافہ ہوا اور اس نے کہا اللہ تعالیٰ تو اپنے رسول اللہ (صلی اللہ علیہ وآلہ وسلم) کے لیے جو چاہے حلال کر دے اس پر جناب رسول اللہ (صلی اللہ علیہ وآلہ وسلم) کو غصہ آگیا اور فرمایا میں تم میں سب سے زیادہ اللہ تعالیٰ سے ڈرنے والا ہوں اور تم میں سب سے زیادہ اس کی حدود سے واقف ہوں۔ اس سے بات پر دلالت مل گئی جو ہم نے بیان کی ہے۔ آثار کو سامنے رکھتے ہوئے اس باب کی یہی صورت ہے اور یہ امام ابوحنیفہ ‘ ابو یوسف ‘ محمد رحمہم اللہ کا قول ہے اور متقد میں سے بھی اسی طرح منقول ہے۔ آثار ذیل میں ہیں۔
تخریج : مسلم فی الصیام نمبر ٧٤۔
یہ روایت دلالت کر رہی ہے کہ جو حکم اس سلسلہ میں جناب رسول اللہ (صلی اللہ علیہ وآلہ وسلم) کا ہے وہی حکم دیگر افراد کا بھی ہے آثار کے لحاظ سے اس باب کا یہ حکم ہم نے ثابت کردیا۔
ہمارے ائمہ ابوحنیفہ ‘ ابو یوسف ‘ محمد رحمہم اللہ کا یہی قول ہے۔