٣٣٧٢: سمیی مولیٰ ابی بکر بیان کرتے ہیں کہ میں نے ابوبکر بن عبدالرحمن کو کہتے سنا کہ میں اور میرے والد دونوں مروان بن حکم حاکم مدینہ کے ہاں تھے اس کے ہاں یہ تذکرہ چلا کہ ابوہریرہ (رض) کہتے ہیں کہ جس نے صبح صادق جنابت کی حالت میں کی اس کا روزہ نہ ہوگا۔
مروان نے کہا میں تمہیں قسم دیتا ہوں کہ تم دونوں امّ المؤمنین حضرت عائشہ (رض) اور امّ المؤمنین امّ سلمہ (رض) کے ہاں جاؤ اور ان دونوں سے اس کے متعلق پوچھ کرآؤ چنانچہ عبدالرحمن گئے اور میں بھی ان کے ساتھ گیا ہم دونوں عائشہ (رض) کی خدمت میں پہنچے اور عبدالرحمن نے سلام پیش کیا پھر کہا۔ اے امّ المؤمنین ! ہم مروان کے ہاں تھے ان کے ہاں ابوہریرہ (رض) کی یہ بات ذکر کی گئی کہ جس نے جنابت کی حالت میں صبح کی اس کا روزہ درست نہیں ہوتا۔
حضرت عائشہ (رض) نے کہا اے عبدالرحمن ! ابوہریرہ (رض) نے غلط کہا کیا تم اس سے اعراض کرو گے جو جناب رسول اللہ (صلی اللہ علیہ وآلہ وسلم) کہا کرتے تھے ؟ عبدالرحمن نے جواب دیا نہیں۔ اللہ کی قسم !
وہ کہنے لگیں میں گواہی دیتی ہوں کہ جناب رسول اللہ (صلی اللہ علیہ وآلہ وسلم) جماع اہل کے ساتھ جنابت کی حالت میں صبح کرتے نہ کہ احتلام سے پھر آپ اس دن کا روزہ اسی حالت میں رکھتے۔
عبدالرحمن کہتے ہیں پھر وہاں سے نکلے اور امّ سلمہ (رض) کی خدمت میں پہنچے اور ان سے اس سلسلہ میں دریافت کیا تو انھوں نے وہی کہا جو عائشہ (رض) نے فرمایا تھا۔
پھر ان کے ہاں سے نکل کر ہم مروان کے پاس آئے اور عبدالرحمن نے امہات المؤمنین کا قول اس کے سامنے نقل کیا۔
تو مروان نے کہا۔ اے ابو محمد میں تمہیں قسم دیتا ہوں کہ تم میرے گھوڑے پر سوار ہوجاؤ وہ دروازہ کے باہر موجود ہے اور مقام عقیق میں ابوہریرہ (رض) کی زمین پر جا کر ان کو اس بات کی اطلاع دو ۔
چنانچہ عبدالرحمن سوار ہوئے اور میں بھی ان کے ساتھ سوار ہوا یہاں تک کہ ہم ابوہریرہ (رض) کی خدمت میں آئے عبدالرحمن نے پہلے ان کے ساتھ کچھ دیر باتیں کیں پھر ان کے سامنے اس مسئلہ کا تذکرہ کیا۔
ابوہریرہ (رض) کہنے لگے مجھے اس بات کا کچھ علم نہیں مجھے تو ایک بتلانے والے نے بتلایا ہے۔
تخریج : بخاری فی الصوم باب ٢٢‘ مسلم فی الصیام ٧٥‘ مسند احمد ٦؍٣٤‘ ٣٦۔
جس شخص نے جنابت کی حالت میں صبح کی اس کا روزہ درست ہے یا نہیں۔
نمبر 1: حسن بصری عطاء بن رباح رحمہم اللہ وغیرہ نے طلوع فجر تک غسل کو مؤخر کرنے کی صورت میں روزے کو درست قرار نہیں دیا قضاء لازم ہوگی۔
نمبر 2: ائمہ اربعہ جمہور صحابہ وتابعین نے اس کے روزے کو ہر حال میں درست قرار دیا خواہ غفلت و نسیان سے غسل میں تاخیر کرے یا قصداً تاخیر کی ہو۔
فریق اوّل کا مؤقف و دلائل : جو شخص جنابت سے صبح کرے اور صبح صادق سے قبل غسل نہ کرے اس کا روزہ درست نہ ہوگا اسے روزے کی قضا لازم ہے۔