٣٦٥٢: اعرج نے ابوہریرہ (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے ایک آدمی کو دیکھا کہ وہ ہدی کے جانور کو ہانک رہا ہے آپ نے فرمایا اس پر سوار ہوجاؤ۔ وہ کہنے لگا یارسول اللہ (صلی اللہ علیہ وآلہ وسلم) یہ ہدی کا اونٹ ہے آپ نے فرمایا۔ تم اس پر سوار ہوجاؤ! تم پر افسوس ہے۔
تخریج : بخاری فی الحج باب ١٠٣؍١١٢‘ والوصایاباب ١٢‘ الادب باب ٩٥‘ مسلم فی الحج ٣٧١؍٣٧٣‘ ابو داؤد فی المناسک باب ١٧‘ ترمذی فی الحج باب ٧٢‘ نسائی فی الحج باب ٧٣؍٧٤‘ ابن ماجہ فی المناسک باب ١٠٠‘ دارمی فی المناسک باب ٦٩‘ مالک فی الحج ١٣٥‘ مسند احمد ٢؍٢٤٥‘ ٤٧٣‘ ٤٧٨‘ ٣؍٩٩‘ ١٠٦‘ ٢٣٤‘ ٢٥١‘ ٢٧٦‘ ٢٩١۔
ہدی کے جانور کا دودھ استعمال کرنا بلاکراہت جائز ہے کذا قال احمد (رح) ۔ " مگر ائمہ ثلاثہ کے ہاں دودھ کا استعمال درست نہیں اگر کرلیا تو تاوان لازم ہوگا البتہ امام مالک تاوان کے قائل نہیں۔ ! ہدی کے جانور پر سواری اسحاق بن راہویہ کے ہاں بلاکراہت جائز ہے " جبکہ ائمہ اربعہ کے ہاں بلاضرورت سواری کرنا جائز نہیں۔ ضرورت شدیدہ کی صورت میں جائز ہے۔ اگر اس سے جانور میں کمزوری آئی تو تاوان ادا کرے گا۔
فریق اوّل کا مؤقف اور دلائل :
ہدی قران و تمتع پر بلاکراہت سواری درست ہے اس میں کسی قسم کی قباحت نہیں ہے۔ دلیل اگلی روایات ہیں۔